శ్రీరాధికాష్టకం (రఘునాధదాస గోస్వామి విరచితం)
రస-వలిత-మృగాక్షీ మౌలిమాణిక్యలక్ష్మీః
ప్రముదితమురవైరిప్రేమవాపీమరాలీ
వ్రజవరవృషభానోః పుణ్యగీర్వాణవల్లీ
స్నపయతు నిజదాస్యే రాధికా మాం కదా ను 1
స్ఫురదరుణదుకూలద్యోతితోద్యన్నితంబ-
స్థలమభివరకాంచీలాస్యముల్లాసయంతీ
కుచకలశవిలాసస్ఫీతముక్తాసరఃశ్రీః
స్నపయతు నిజదాస్యే రాధికా మాం కదా ను 2
సరసిజవరగర్భాఖర్వకాంతః సముద్యత్-
తరుణిమఘనసారాశ్లిష్టకైశోరసీధుః
దరవికసితహాస్యస్యందబింబాధరాగ్రా
స్నపయతు నిజదాస్యే రాధికా మాం కదా ను 3
అతిచటులతరం తం కాననాంతర్మిలంతం
వ్రజనృపతికుమారం వీక్ష్య శంకాకులాక్షీ
మధురమధువచోభిః సంస్తుతా నేత్రభంగయా
స్నపయతు నిజదాస్యే రాధికా మాం కదా ను 4
వ్రజకులమహిలానాం ప్రాణభూతాఽఖిలానాం
పశుపపతిగృహిణ్యాః కృష్ణవత్ప్రేమపాత్రం
సులలితలలితాంతః స్నేహఫుల్లాంతరాత్మా
స్నపయతు నిజదాస్యే రాధికా మాం కదా ను 5
నిరవధి సవిశాఖా శాఖియూథప్రసూనైః
స్రజమిహ రజయంతీ వైజయంతీం వనాంతే
అఘవిజయవరోరః ప్రేయసీ శ్రేయసీ సా
స్నపయతు నిజదాస్యే రాధికా మాం కదా ను 6
ప్రకటితస్వనివాసం స్నిగ్ధవేణుప్రణాదైః
ద్రుతగతిహరిమారాత్ప్రాప్య కుంజే స్మితాక్షీ
శ్రవణకుహరకండూం తన్వతీ నమ్రవక్త్రా
స్నపయతు నిజదాస్యే రాధికా మాం కదా ను 7
అమలకమలరాజిస్పర్శవాతప్రశీతే
నిజసరసి నిదాఘే సాయముల్లాసినీయం
పరిజనగణయుక్తా క్రీడయంతీ బకారిం
స్నపయతు నిజదాస్యే రాధికా మాం కదా ను 8
పఠతి విమలచేతాః మిష్టరాధాష్టకం యః
పరిహృతనిఖిలాశాసంతతిః కాతరః సన్
పశుపపతికుమారః కమ్రమామోదితస్తం
నిజజనగణమధ్యే రాధికాయాస్తనోతి 9
ఇతి శ్రీరఘునాథదాసగోస్వామివిరచితస్తవావల్యాం శ్రీరాధికాష్టకం సంపూర్ణం
No comments:
Post a Comment