కాళి శతనామ స్తోత్రం
భైరవ ఉవాచ -
శతనామ ప్రవక్ష్యామి కాలికాయా వరాననే ।
యస్య ప్రపఠనాద్వాగ్మీ సర్వత్ర విజయీ భవేత్ ॥ ౧॥
కాలీ కపాలినీ కాన్తా కామదా కామసున్దరీ ।
కాలరాత్రిః కాలికా చ కాలభైరవపూజితా ॥ ౨॥
కురుకుల్లా కామినీ చ కమనీయస్వభావినీ ।
కులీనా కులకర్త్రీ చ కులవర్త్మప్రకాశినీ ॥ ౩॥
కస్తూరీరసనీలా చ కామ్యా కామస్వరూపిణీ ।
కకారవర్ణనిలయా కామధేనుః కరాలికా ॥ ౪॥
కులకాన్తా కరాలాస్యా కామార్తా చ కలావతీ ।
కృశోదరీ చ కామాఖ్యా కౌమారీ కులపాలినీ ॥ ౫॥
కులజా కులకన్యా చ కులహా కులపూజితా ।
కామేశ్వరీ కామకాన్తా కుఞ్జరేశ్వరగామినీ ॥ ౬॥
కామదాత్రీ కామహర్త్రీ కృష్ణా చైవ కపర్దినీ ।
కుముదా కృష్ణదేహా చ కాలిన్దీ కులపూజితా ॥ ౭॥
కాశ్యపీ కృష్ణమాతా చ కులిశాఙ్గీ కలా తథా ।
క్రీంరూపా కులగమ్యా చ కమలా కృష్ణపూజితా ॥ ౮॥
కృశాఙ్గీ కిన్నరీ కర్త్రీ కలకణ్ఠీ చ కార్తికీ ।
కమ్బుకణ్ఠీ కౌలినీ చ కుముదా కామజీవినీ ॥ ౯॥
కులస్త్రీ కీర్త్తికా కృత్యా కీర్తిశ్చ కులపాలికా ।
కామదేవకలా కల్పలతా కామాఙ్గవర్ధినీ ॥ ౧౦॥
కున్తా చ కుముదప్రీతా కదమ్బకుసుమోత్సుకా ।
కాదమ్బినీ కమలినీ కృష్ణానన్దప్రదాయినీ ॥ ౧౧॥
కుమారీపూజనరతా కుమారీగణశోభితా ।
కుమారీరఞ్జనరతా కుమారీవ్రతధారిణీ ॥ ౧౨॥
కఙ్కాలీ కమనీయా చ కామశాస్త్రవిశారదా ।
కపాలఖట్వాఙ్గధరా కాలభైరవరూపిణీ ॥ ౧౩॥
కోటరీ కోటరాక్షీ చ కాశీ కైలాసవాసినీ ।
కాత్యాయనీ కార్యకరీ కావ్యశాస్త్రప్రమోదినీ ॥ ౧౪॥
కామాకర్షణరూపా చ కామపీఠనివాసినీ ।
కఙ్కినీ కాకినీ క్రీడా కుత్సితా కలహప్రియా ॥ ౧౫॥
కుణ్డగోలోద్భవప్రాణా కౌశికీ కీర్తివర్ధినీ ।
కుమ్భస్తనీ కటాక్షా చ కావ్యా కోకనదప్రియా ॥ ౧౬॥
కాన్తారవాసినీ కాన్తిః కఠినా కృష్ణవల్లభా ।
ఇతి తే కథితం దేవి గుహ్యాద్గుహ్యతరం పరమ్ ॥ ౧౭॥
ప్రపఠేద్య ఇదం నిత్యం కాలీనామశతాష్టకమ్ ।
త్రిషు లోకేషు దేవేశి తస్యాసాధ్యం న విద్యతే ॥ ౧౮॥
ప్రాతఃకాలే చ మధ్యాహ్నే సాయాహ్నే చ సదా నిశి ।
యః పఠేత్పరయా భక్త్యా కాలీనామశతాష్టకమ్ ॥ ౧౯॥
కాలికా తస్య గేహే చ సంస్థానం కురుతే సదా ।
శూన్యాగారే శ్మశానే వా ప్రాన్తరే జలమధ్యతః ॥ ౨౦॥
వహ్నిమధ్యే చ సఙ్గ్రామే తథా ప్రాణస్య సంశయే ।
శతాష్టకం జపన్మన్త్రీ లభతే క్షేమముత్తమమ్ ॥ ౨౧॥
కాలీం సంస్థాప్య విధివత్ స్తుత్వా నామశతాష్టకైః ।
సాధకస్సిద్ధిమాప్నోతి కాలికాయాః ప్రసాదతః ॥ ౨౨॥
ఇతి శ్రీకాలీశతనామస్తోత్రం సమ్పూర్ణమ్ ॥
No comments:
Post a Comment