సౌఖ్యాష్టకం
నిరర్గల-సమున్మిషన్నవ-నవానుకంపామృత-
ప్రవాహ-రస-మాధురీ-మసృణ-మానసోల్లాసిని
నమజ్జన-మనోరథ-ప్రణయనైక-దీక్షావ్రతే !
నిధేహి మమ మస్తకే చరణ-పంకజం తావకం 1
నమన్మృడ-జటాటవీ-గలిత-గాంగ-తోయ-శ్రితే !
స్పురన్మధుర-విగ్రహ-ప్రచుర-కాంతి-సందానితే
సుసౌరభ-కరంబితే ! త్రిపురవైరి-సీమంతిని !
త్వదీయ-పద-పంకజే మమ మనో మిలిందాయతాం 2
ఉదంచయ- దృగంచలం, రచయ సాంద్రసాంద్రాం దయాం
వికాసయ నిజం పదం, విఘటయాశు దుఃఖ-త్రయం !
అయే ! ప్రకటయాధునా విధుత-తర్క-జాలామల-
ప్రబోధ-రస-మాధురీం వివిధ-మంగలారంభిణి ! 3
త్వయైవ జగదంకురో భవన-విక్రియాం నీయతే
కిమిత్యపర-కల్పనా తదుదరాంతరాలంబినీ
అనన్య-సదృశ-క్రియే!భగవతీం విహాయాహకం
కథం కథయ చేతనః శశ-విషాణమాప్తుం యతే 4
భవేద్యది జపావనీ సరిదుదంచదర్కచ్ఛటా-
స్ఫుటారుణిమ-మజ్జిమా మసృణ-లోహితేహాబ్జినీ
కథంచన తదా మనో జనని ! తావకాంగ-ప్రభా-
శ్రియం తులయితుం వ్రజేత్తదపి తస్య కాపేయకం 5
నిసర్గ-మధురాకృతే గిరిశ-నేత్ర-రాకాయితే !
నవావృతి-చమత్కృతే ! పరిలసత్-సపర్యాకృతే
మయాద్య మనసా ధృతేఽచిరయ మాతరుద్యద్దయా-
సుధా-హ్రద-నిమజ్జనాకరణ-కేలి-సీమాయతే 6
మహేశ్వర-పరిగ్రహే ! స్తుతి-పరాయణానుగ్రహే !
మహాస్పురణ-విగ్రహే నిరయ-యాతనా-నిగ్రహే !
ప్రసీద సుఖ-సంగ్రహే ! ప్రణత-దుఃఖ-భంగాగ్రహే !
వినాశిత-మహాగ్రహే ! విమల-భక్తి-యోగ-గ్రహే ! 7
మహాభయ-నివారిణీ, సకల-శోక-సంహారిణీ,
భవాంబు-నిధి-తారిణీ, దురిత-జాత-విద్రావిణీ
అహమ్మతి-విదారిణీ, పతిత-మండలోద్ధారిణీ,
మమాంతర-విహారిణీ, భవతు సౌఖ్యసంచారిణీ 8
ఇతి సౌఖ్యాష్టకం సంపూర్ణం
No comments:
Post a Comment