సకలజననీస్తవః
జనన-మరణ-జన్మ-త్రాస-ఘోరాంధకార-ప్రశమన-కరణాయాహ్నాయ కాచిత్ప్రదీప్తిః
తరుణ-తరణి-రాగం మ్లానిమానం నయంతీ విహరతు మమ చితే చంద్ర-ఖండావతంసా 1
న భవతి ఖలు యావత్కాయ-వైక్లవ్య-భావో న చ పతతి కృతాంత-క్రూర-దృష్టి-ప్రపాతః
నను హృదయ ! సముద్యద్దీన-దైన్యావసాద-ప్రణయన-రసికాం తాం తావదాసాదయాశు 2
సరస-సరసిజాత-స్ఫార-సౌందర్య-సార-స్ఫురదవయవ-కాండోద్దామ-లావణ్యవాపీ
అనుసరదనుకంపా-పూర-పూర్ణాతిమాత్రం శమయతు, మమ తాపం సా శశాంకార్ధ-చూడా 3
జనని ! నత-నిలింపీ-మౌలి-మందార-మాలా-శ్లథ-కుసుమ-మరంద-మ్లాన-పాదారవిందే
భవ-పరిభవ-విద్ధే వాసనా-జాల-రుద్ధే మసృణ-నయన-పాతం పాతయాస్మిన్ వరాకే 4
సకల-భువన-భారం పంచ-కృత్యావసానం నతిసుకృతిషు దేవేషూచ్చకైరర్పయిత్వా
కిమపి నిగమ-రూఢం గూఢ-తత్త్వం ప్రపన్నా శిశిరయతు, మదీయం స్వాంతమశ్రాంతమేషా 5
జనని ! యది భవత్యాః శక్తిరాత్మ-ప్రభావం వ్యపనయతి, తదానీం నిష్క్రియో లోక ఏషః
ఇతి పరిచిత-తత్త్వేఽప్యజ్ఞభావం భజంతస్తవసమయవిమూఢాః సంసరంతి, స్ఖలంతి 6
ప్రకృతి-గుణ-వికారాః ప్రాకృతే వ్యాప్రియంతే న ఖలు పురుషభావే దర్శనేఽస్మిన్ స్ఫుటేఽపి
తవ సమయ-సపర్యా-భావనాంధః శరీరీ సకలజనని ! నాహంభావభావం జహాతి 7
శ్రుతిరపి పరిమాతుం యాం న శక్నోత్యశేషాత్తదితర-జన-గాథా-జల్పనాస్తాం, సుదూరే
ఇతి విహిత-వివేకః పాహి పాహీతి జల్పన్ కథమపి తవ పాద-ధ్యాన-దత్తాదరః స్యాం 8
ఇతి సకలజననీస్తవః సంపూర్ణః
No comments:
Post a Comment