శ్రీరాధాకృష్ణసుప్రభాతం Shri Radhakrishna Suprabhatam

 శ్రీరాధాకృష్ణసుప్రభాతం 

సత్యం ధర్మమపీహ రక్షితుమహో భూభారనాశాయ వై

దైత్యైస్తాపితసర్వదైవతగణాన్ సంరక్షితుం లీలయా 

లీలామానుషవిగ్రహః సమభవద్యో వా హరిర్భూతలే

రాధాకృష్ణమహాప్రభుః స భగవాన్ రక్షాం కరోత్వన్వహం 1

గోపీరూపధరాన్ మహామునిగణాన్ గోరూపదేవాన్ సదా

రక్షాయై సమనుగ్రహాయ చ ముదా కృష్ణం వపుః ప్రాప యః

సోఽయం సార్వజనీనవంద్యవిభవో విశ్వైకరక్షాకరః

రాధాకృష్ణమహాప్రభో సురపతే తే సుప్రభాతం శుభం 2

సౌందర్యం కిల మూర్తమేవ సకలం లోకైకవిస్మాపకం

చౌర్యం యస్య చ భక్తసంఘవినుతం పాపాపహం ప్రత్యహం 

ముష్ణంత్యద్య హి కృష్ణచౌర్యసుకథాః భక్తస్య దుఃఖాని వై

రాధావల్లభ రాసకేలిరసిక శ్రీసుప్రభాతం శుభం 3

వేదాంతప్రతిపాద్యమానవిభవో వేదైకవేద్యప్రభుః

వంశీవాదనలోలుపః వ్రజజనానందైకధుర్యో విభుః 

విఖ్యాతో భువనేషు బాలవపుషా వీణామునీంద్రస్తుతః

రాధాలోల రమాపతే యదుపతే తే సుప్రభాతం శుభం 4

రాధావల్లభ రంజితాఖిలమనాః కందర్పదర్పాపహ

లీలాలోలుప లబ్ధభక్తిసులభ శ్రీదేవకీనందన 

లీలామానుష లోలకుంతల మహాలావణ్యరత్నాకర

రాధామాధవ రమ్యకేలికుతుకిన్ తే సుప్రభాతం శుభం 5

పూజ్యాష్టాక్షరమంత్రమంత్రిత నమో నారాయణాఖ్య ప్రభో

శ్రీమద్ద్వాదశమంత్రనిత్యమహిత శ్రీవాసుదేవ ప్రభో 

రాంపూర్వైశ్చ షడక్షరైః సువిదిత శ్రీవీరరామ ప్రభో

రాధాకృష్ణ మహాప్రభోఽఖిలగురో తే సుప్రభాతం శుభం 6

త్వం సాందీపనిసద్గురోర్హి వచసా సాముద్రమగ్నం శిశుం

ఆనీయాపి చ సద్గురోర్హి నికటే ప్రత్యర్పయః సత్వరం 

తేన త్వాం గురురాట్ ప్రపూజయదహో పుత్రస్య లాభాత్ స్వకాత్

భో దేవ త్వమచింత్యవిక్రమగుణస్తే సుప్రభాతం శుభం 7

భుక్త్వా తత్పృథుకం కుచేలగృహిణీసంప్రేషితం సాదరం

విద్యాభ్యాససహాయకస్య చ గృహం శ్రీశ్రీసమృద్ధం వ్యధాః 

ఆర్తత్రాణపరాయణః స భగవాన్ సర్వస్వదానోద్యతః

రాధాకృష్ణ సుసుందరార్తిహరణ శ్రీసుప్రభాతం శుభం 8

ఆదిత్యాదినవగ్రహాశ్చ తిథయః హోరా చ యోగాస్తథా

నక్షత్రాణి చ వాస్తవః ప్రతిదినం దిక్పాలభూతాని వా

రాధాకృష్ణనివిష్టచేతసమమీ నో పీడయంతి ధ్రువం

రాధాకృష్ణమహాప్రభో తవ శుభం సుప్రాతమేవాద్య హి 9

దేవ త్వాం శరణం గతోఽస్మి సతతం రాధామనోల్లాసక

త్వం మాతాసి పితా తథైవ సహజో బంధుశ్చ పుత్రీ సుతః 

సర్వస్వం హి మమ త్వమేవ సతతం శ్రీగోపికాప్రేమభాక్

పాహ్యస్మాన్ సకుటుంబకాన్ తవ పదద్వంద్వైకసేవారతాన్ 10

రాధాకృష్ణమహాప్రభో త్రిభువనక్షేమంకరస్యాశు వై

శ్రీసుప్రాతమిమం సమాధితమనా యో వా పఠేదన్వహం 

సో నిత్యం విజయీ సమాప్తసుధనః సత్పుత్రపౌత్రైర్వృతః

దీర్ఘాయుశ్చ నిరామయశ్చ నివసేత్ శ్రీకృష్ణకారుణ్యతః 11

ఇతి శ్రీరాధాకృష్ణసుప్రభాతం