శివజయవాద స్తోత్రమ్
జయ జయ గిరిజాలఙ్కృతవిగ్రహ, జయ జయ వినతాఖిలదిక్పాల |
జయ జయ సర్వవిపత్తివినాశన, జయ జయ శఙ్కర దీనదయాళ ||౧||
జయ జయ సకలసురాసురసేవిత, జయ జయ వాంఛితదానవితన్ద్ర |
జయ జయ లోకాలోకధురన్ధర జయ జయ నాగేశ్వర ధృతచన్ద్ర ||౨||
జయ జయ హిమాచలనివాసిన్ జయ జయ కరుణాకల్పితలిఙ్గ |
జయ జయ సంసృతిరచనాశిల్పిన్ జయ జయ భక్తహృదంబుజభృఙ్గ ||౩||
జయ జయ భోగిఫణామణిరఞ్జిత, జయ జయ భూతివిభూషితదేహ |
జయ జయ పితృవనకేలిపరాయణ, జయ జయ గౌరీవిభ్రమగేహ ||౪||
జయ జయ గాఙ్గతరఙ్గలులితజట, జయ జయ మఙ్గళపూరసముద్ర |
జయ జయ బోధవిజృంభణకారణ , జయ జయ మానసపూర్తివినిద్ర ||౫||
జయ జయ దయాతరఙ్గితలోచన, జయ జయ చిత్రచరిత్రపవిత్ర |
జయ జయ శబ్దబ్రహ్మవికాశక, జయ జయ కిల్బిషతాపధవిత్ర ||౬||
జయ జయ తన్త్రనిరూపణతత్పర, జయ జయ యోగవికస్వరధామ |
జయ జయ మదనమహాభటభఞ్జన, జయ జయ పూరితపూజకకామ ||౭||
జయ జయ గఙ్గాధర విశ్వేశ్వర, జయ జయ పతితపవిత్రవిధాన |
జయ జయ బంబంనాద కృపాకర, జయ జయ శివ శివ సౌఖ్యనిధాన ||౮||
య ఇమం శివజయవాదముదారం పఠతి సదా శివధామ్ని |
తస్య సదాశివశాసనయోగాన్మాద్యతి సంపన్నామ్ని ||౯||
ఇతి శివజయవాదస్తోత్రం సంపూర్ణమ్ ||
No comments:
Post a Comment