శ్రీ హాటకేశ్వరాష్టకమ్
జటాతటాన్తరోల్లసత్సురాపగోర్మిభాస్వరమ్
లలాటనేత్రమిన్దునావిరాజమానశేఖరమ్ |
లసద్విభూతిభూషితం ఫణీంద్రహారమీశ్వరమ్
నమామి నాటకేశ్వరం భజామి హాటకేశ్వరమ్ || ౧ ||
పురాన్ధకాదిదాహకం మనోభవప్రదాహకమ్
మహాఘరాశినాశకం అభీప్సితార్థదాయకమ్ |
జగత్త్రయైకకారకం విభాకరం విదారకమ్
నమామి నాటకేశ్వరం భజామి హాటకేశ్వరమ్ || ౨ ||
మదీయ మానసస్థలే సదాఽస్తు తే పదద్వయమ్
మదీయ వక్త్రపంకజే శివేతి చాక్షరద్వయమ్ |
మదీయ లోచనాగ్రతః సదాఽర్ధచన్ద్రవిగ్రహమ్
నమామి నాటకేశ్వరం భజామి హాటకేశ్వరమ్ || ౩ ||
భజంతి హాటకేశ్వరం సుభక్తి భావతో త్రయే
భజంతి హాటకేశ్వరం ప్రమాణమాత్ర నాగరాః |
ధనేన తేజ సాధికాః కులేన చాఽఖిలోన్నతాః
నమామి నాటకేశ్వరం భజామి హాటకేశ్వరమ్ || ౪ ||
సదా శివోఽహమిత్యహర్నిశం భజేత యో జనాః
సదా శివం కరోతి తం న సంశయోఽత్ర కశ్చన |
అహో దయాలుతా మహేశ్వరస్య దృశ్యతాం బుధా
నమామి నాటకేశ్వరం భజామి హాటకేశ్వరమ్ || ౫ ||
ధరాధరాత్మజాపతే త్రిలోచనేశ శంకరం
గిరీశ చన్ద్రశేఖరాఽహిరాజభూషణేశ్వరా |
మహేశ నన్దివాహనేతి సఙ్ఘటన్నహర్నిశం
నమామి నాటకేశ్వరం భజామి హాటకేశ్వరమ్ || ౬ ||
మహేశ పాహి మాం ముదా గిరీశ పాహి మాం సదా
భవార్ణవే నిమజ్జతస్త్వమేవ మేఽసి తారకః |
కరావలంబనం ఝటిత్యహోఽధునా ప్రదీయతాం
నమామి నాటకేశ్వరం భజామి హాటకేశ్వరమ్ || ౭ ||
ధరాధరేశ్వరేశ్వరం శివం నిధీశ్వరేశ్వరం
సురాసురేశ్వరం రమాపతీశ్వరం మహేశ్వరం |
ప్రచణ్డ చణ్డికేశ్వరం వినీత నన్దికేశ్వరం
నమామి నాటకేశ్వరం భజామి హాటకేశ్వరమ్ || ౮ ||
హాటకేశస్య భక్త్యా యో హాటకేశాష్టకం పఠేత్ |
హాటకేశ ప్రసాదేన హాటకేశత్వమాప్నుయాత్ ||
No comments:
Post a Comment