సప్తశతీ ధ్యానాత్మకం స్తోత్రం saptashati dhyanatmakam stotram telugu

  సప్తశతీ ధ్యానాత్మకం స్తోత్రం 

శ్రీగణేశాయ నమః 

విద్యుద్దామసమప్రభాం మృగపతిస్కంధస్థితాం భీషణాం

     కన్యాభిః కరవాలఖేటవిలసద్ధస్తాభిరాసేవితాం 

హస్తైశ్చక్రదరాలిఖేటవిశిఖాశ్చాపం గుణం తర్జనీం

     బిభ్రాణామనలాత్మికాం శశిధరాం దుర్గాం త్రినేత్రాం భజే 1

మాతర్మే మధుకైటభఘ్ని మహిషప్రాణాపహారోద్యమే

     హేలానిర్మితధూమ్రలోచనవధే హే చండముండార్దిని 

నిఃశేషీకృతరక్తబీజదనుజే నిత్యే నిశుంభాపహే

     శుంభధ్వంసిని సహరాశు దురితం దుర్గే నమస్తేఽమ్బికే 2

యా దేవీ మధుకైటభప్రమథినీ యా మాహిషోన్మూలినీ

     యా ధూమ్రేక్షణచండముండశమనీ యా రక్తబీజాశినీ 

యా శుంభాదినిశుంభదైత్యదమనీ యా సిద్ధలక్ష్మీ పరా

     సా చండీ నవకోటిశక్తిసహితా మాం పాతు విశ్వేశ్వరీ 3

దుర్గాం ధ్యాయతు దుర్గతిప్రశమనీం దూర్వాదలశ్యామలాం

     చంద్రార్ధోజ్జ్వలశేఖరాం త్రినయనామాపీతవాసోవసం 

చక్రం శంఖమిషుం ధనుశ్చ దధతీం కోదండబాణాశయో-

     ర్ముద్రేవాభయకామదే సకటిబంధాభీష్టదాం వానయోః 4

భావోద్భేదవృతా సహాభయవరా విస్రస్తనీలాలకా

     బింబోష్ఠీ తరుణాఽరుణాబ్జచరణా రక్తాంతనేత్రత్రయా 

పీనోరుస్తనభారభంగురతనుః శ్యామా ప్రసన్నాననా

     దేవీ వస్త్వరితా తనోతు విభవానానందయంతీ మనః 5

ముక్తావిద్యుత్పయోదస్ఫటికనవజపాభాస్వరైః పంచవక్త్రైః

     శీతాంశూల్లాసిచూడైస్త్రినయనలసితైర్భాసురామచ్ఛవర్ణాం 

చక్రం శంఖం కపాలం గుణపరశుసుధాకుంభవేదాక్షమాలా

     విద్యాపద్మాన్వహంతీం నమత మునినతాం భారతీం పద్మసంస్థాం 6

హంసారూఢా హరహసితహారేందుకుందావదాతా

     వాణీ మందస్మితతరముఖీ మౌలిబద్ధేందులేఖా 

విద్యావీణాఽమృతమయఘటాక్షస్రజాదీప్తహస్తా

     శ్వేతాబ్జస్థా భవదభిమతప్రాప్తయే భారతీ స్యాత్ 7

సౌవర్ణాంబుజమధ్యగాం త్రినయనాం సౌదామినీసన్నిభాం

     శంఖం చక్రవరాభయం చ దధతీమిందోః కలాం బిభ్రతీం 

గ్రైవేయాంగదహారకుండలధరామాఖండలాద్యైః స్తుతాం

     ధ్యాయేద్వింధ్యనివాసినీం శశిముఖీం పార్శ్వస్థపంచాననాం 8

శంఖం చక్రమథో ధనుశ్చ దధతీం బిభ్రామితాం తర్జనీం

     వామే శక్తిమసిం శరాన్కలయతీం తిర్యక్ త్రిశూలం భుజైః 

సన్నద్ధాం వివిధాయుధైః పరివృతాం మంత్రీ కుమారీజనై-

     ర్ధ్యాయేదిష్టవరప్రదాం త్రినయనాం సింహాధిరూఢాం శివాం 9

శంఖాసిచాపశరభిన్నకరాం త్రినేత్రాం

     తిగ్మేతరాంశుకలయా విలసత్కిరీటాం 

సింహస్థితాం ససురసిద్ధనుతాం చ దుర్గాం

     దూర్వానిభాం దురితవర్గహరాం నమామి 10

ప్రకాశమధ్యస్థితచిత్స్వరూపాం వరాభయే సందధతీం త్రినేత్రాం 

సిందూరవర్ణామతికోమలాంగీం మాయామయీం తత్త్వమయీం నమామి 11

శోణప్రభాం సోమకలావతంసాం పాణిస్ఫురత్పంచశరేషుచాపాం 

ప్రాణప్రియాం నౌమి పినాకపాణేః కోణత్రయస్థాం కులదేవతాం మే 12

ఖంగోద్భిన్నేందుబింబస్రవదమృతరసాప్లావితాంగీ త్రినేత్రా

     సవ్యే పాణౌ కపాలాద్గలదమృతమథో ముక్తకేశీ పిబంతీ 

దిగ్వస్త్రాబద్ధకాంచీమణిమయముకుటాద్యైర్యుతా దీప్తజిహ్వా

     పాయాన్నీలోత్పలాభా రవిశశివిలసత్కుండలాలీఢపాదా 13

సద్యశ్ఛిన్నశిరఃకృపాణమభయం హస్తైర్వరైర్బిభ్రతీం

     ఘోరాస్యాం శిరసాఽస్రజాసురుచిరామున్ముక్తకేశావలిం 

సృక్కాసృక్ప్రవహాం శ్మశాననిలయాం శ్రుత్యోః శవాలంకృతిం

     శ్యామాంగీం కృతమేఖలాశవకరాం దేవీం భజే కాలికాం 14

సర్వాద్యామగుణామలక్ష్యవపుషం వ్యాప్యాఖిలం సంస్తుతాం

     లక్ష్యాం చ త్రిగుణాత్మికాం కనకభాం సౌవర్ణభూషాన్వితాం 

బీజాపూరగదే చ ఖేటకసుధాపాత్రే కరైర్బిభ్రతీం

     యోనిం లింగమహిం చ మూర్ధ్ని దధతీం చండీం భజే చిన్మయీం 15

ధృత్వా శ్రీర్మాతులింగం తదుపరి చ గదాం ఖేటకం పానపాత్రం

     నాగం లింగం చ యోనిం శిరసి ధృతవతీ రాజతే హేమవర్ణా 

ఆద్యా శక్తిస్త్రిరూపా త్రిగుణపరివృతా బ్రహ్మణో హేతుభూతా

     విశ్వాద్యా సృష్టికర్త్రీ వసతు మమ గృహే సర్వదా సుప్రసన్నా 16

యా సా పద్మాసనస్థా విపులకటితటీపద్మపత్రాయతాక్షీ

     గంభీరావర్తనాభిస్తనభరనమితా శుభ్రవస్త్రోత్తరీయా 

లక్ష్మీర్దివ్యైర్గజేంద్రైర్మణిగణఖచితైః స్నాపితా హేమకుభై-

     ర్నిత్యం సా పద్మహస్తా మమ వసతు గృహే సర్వమాంగల్యయుక్తా 17

లక్ష్మీం కోల్హాపురస్థాం భువి గణపతినాఽగ్రే చ పార్శ్వద్వయే తాం

     కాల్యా వాణ్యాఽఽసమంతాత్పరిజననికరైః సేవితాం దేవతాభిః 

నాగం లింగం చ యోనిం స్వశిరసి దధతీం మాతులింగం గదాం తత్

     ఖేటం శ్రీపానపాత్రం త్రిభువనజననీం నౌమి దోర్భిశ్చతుర్భిః 18

హస్తైః పద్మం రథాంగ గుణమథ హరిణం పుస్తకం వర్ణమాలాం

     టంకం శూలం కపాలం దరమమృతలసద్ధేమకుంభం వహంతీం 

ముక్తావిద్యుత్పయోధేః స్ఫటికనవజపాబంధురైః పంచవక్త్రై-

     స్త్ర్యక్షైర్వక్షోజనమ్రాం సకలశశినిభాం మాతృకాం తాం నమామి 19

బ్రహ్మాణీ కమలేందుసౌమ్యవదనా మాహేశ్వరీ లీలయా

     కౌమారీ రిపుదర్పనాశనకరీ చక్రాయుధా వైష్ణవీ 

వారాహీ ఘనఘోరఘర్ఘరముఖీ చైంద్రీ చ వజ్రాయుధా

     చాముండా గణనాథరుద్రసహితా రక్షంతు మాం మాతరః 20

అరుణకమలసంస్థా తద్రజఃపుంజవర్ణా

     కరకమలధృతేష్టాభీతియుగ్మాంబుజా చ 

మణిముకుటవిచిత్రాఽలంకృతా కల్పజాలై-

     ర్భవతు భువనమాతా సంతతం శ్రీః శ్రియే నః 21

హేమప్రఖ్యామిందుఖండాత్తమౌలిం శంఖారిష్టాభీతిహస్తాం త్రినేత్రాం 

హేమాబ్జస్థాం పీతవర్ణాం ప్రసన్నాం దేవీం దుర్గాం దివ్యరూపాం నమామి 22

సిందూరారుణవిగ్రహాం త్రినయనాం మాణిక్యమౌలిస్ఫురత్-

     తారానాయకశేఖరాం స్మితముఖీమాపీనవక్షోరుహాం 

పాణిభ్యామతిపూర్ణరత్నచషకం రక్తోత్పలం బిభ్రతీం

     సౌమ్యాం రత్నఘటస్థరక్తచరణాం ధ్యాయేత్పరామంబికాం 23

బిభ్రాణా శూలబాణాస్యరిసదరగదాచాపపాశాన్ కరాబ్జై-

     ర్మేఘశ్యామా కిరీటోల్లసితశశికలా భీషణా భూషణాఢ్యా 

సింహస్కంధాధిరూఢా చతసృభిరసిఖేటాన్వితాభిః పరీతా

     కన్యాభిర్భిన్నదైత్యా భవతు భవభయధ్వంసినీ శూలినీ వః 24

అష్టౌభుజాంగీన్ మహిషస్య మర్దినీం సశంఖచక్రాం శరశూలధారిణీం 

తాం దివ్యరూపాం సహ జాతవేదసీం దుర్గాం సదా శరణమహం ప్రపద్యే 25

మహిషమస్తకనృత్తవినోదనస్ఫుటరణన్మణినూపురమేఖలా 

జననరక్షణమోక్షవిధాయినీ జయతు శుంభనిశుంభనిషూదనీ 26

ఉద్ధతౌ మధుకైటభౌ మహిషాసురం చ నిహత్య తం

     ధూమ్రలోచన చండ ముండ రక్తబీజముఖాంశ్చ తాన్ 

దుష్టశుంభనిశుంభమర్దిని నందితాఽమరవందితే

     విష్టపత్రయతుష్టికారిణి భద్రకాలి నమోఽస్తు తే 27

లక్ష్మీప్రదానసమయే నవవిద్రుమాభాం

     విద్యాప్రదానసమయే శరదిందుశుభ్రాం 

విద్వేషివర్గవిజయేఽపి తమాలనీలాం

     దేవీం త్రిలోకజననీం శరణం ప్రపద్యే 28

చంద్రహాసం త్రిశూలం చ శంఖచక్రగదాస్తథా 

ధనుర్బాణం చ ముసలం పింగలం ముష్టిమేవ చ 29

పాశాంకుశభుసుంఠీశ్చ ముద్గరం పరశుం తథా 

వజ్రాయుధం చ కుంతం చ ఖట్వాంగం చ హలాయుధం 30

తూణీరం క్షురికాం ముద్రాం తోమరం పానపాత్రకం 

పట్టసందండనాగం చ కుంతదంతౌ తథైవ చ 31

దర్పణం రుద్రవీణాం చ బిభ్రద్వాత్రింశదోస్తలాం 

పద్మరాగప్రభాం దేవీం బాలార్కకిరణారుణాం 32

రక్తవస్త్రపరీధానాం రక్తమాల్యానులేపనాం 

దశపాదాంబుజాం దేవీం దశమండలపూరితాం 33

దశాననాం త్రినేత్రాం చ సమున్నతపయోధరాం 

ఏవం ధ్యాయేన్మహాజ్వాలాం మహిషాసురమర్దినీం 34

సర్వదారిద్ర్యశమనీం సర్వదుఃఖనివారిణీం 

బ్రహ్మాండమధ్యజిహ్వాం తాం మహావక్త్రకరాలినీం 35

దశసాహస్రదోర్దండాం నానాశస్త్రాస్త్రధారిణీం 

విచిత్రాయుధసన్నద్ధాం విశ్వరూపాం శివాత్మికాం 36

దానవాంతకరీం దేవీం రక్తబీజవధోద్యతాం 

రక్తవస్త్రధరాం చండీం భీషణామతిభైరవాం 37

సంపూర్ణయౌవనాం లక్ష్మీం కాలికాం కమలాననాం 

మధుకైటభసహర్త్రీం మహిషాసురమర్దినీం 38

చండముండశిరశ్ఛేత్త్రీం సర్వదైత్యనిషూదినీం 

రక్తబీజస్య సహర్త్రీమశేషాసురభక్షిణీం 39

నిశుంభశుంభమథినీమశేషాయుధభీషణాం 

మహాబ్రహ్మాండమాలాంగీం సర్వాభరణభూషితాం 40

వేతాలవాహనారూఢాం సింహవ్యాఘ్రాదివాహనాం .

నరరక్తప్రియాం మాయాం మధుమాంసోపహారిణీం 41

య ఇదం శృణుయాన్నిత్యం త్రిసంధ్యం యః పఠేన్నరః 

ఋణకోట్యపహరణం రోగదారిద్ర్యనాశనం 42

సర్వసిద్ధికరం పుణ్యం సర్వకామఫలప్రదం 

భక్తానందకరీం దేవీం పరబ్రహ్మస్వరూపిణీం 43

తామష్టాదశపీఠస్థాం త్రిపురామధిదేవతాం 

వందే విశ్వేశ్వరీం దేవీం భుక్తిముక్తిఫలప్రదాం 44

హదం సప్తశతీధ్యానం సర్వరక్షాకరం నృణాం 

రసం రసాయనం సిద్ధ్యేద్గులికాంజనసిద్ధిదం 45

పాదుకాయుగులం సిద్ధ్యేన్మంత్రసిద్ధికరం నృణాం 

సౌందర్యరాజసమ్మానపుత్రపౌత్రాభివర్ధనం 46

ఐశ్వర్యలాభవిజయభుక్తిముక్తిఫలప్రదం 

సదాసన్నిహితాం లక్ష్మీం చండికాం మమ దేవతాం 47

స్మరేన్నిత్యం ప్రయత్నేన షణ్మాసాత్ప్రాప్యతే ఫలం 

మహాభయాపహరణం శత్రుక్షయకరం తథా 48

అచలాం శ్రియమాప్నోతి సర్వవ్యాధివినాశనం 

అంతే స్వర్గం చ మోక్షం చ సత్యమేవ న సంశయః

ఇతి శ్రీకాశీకర అనంతభట్టసుతరామకృష్ణభట్టసంపాదిత-

సప్తశతీధ్యానాత్మకస్తోత్రం సంపూర్ణం