ఆదిత్య హృదయ స్తోత్రం (భవిష్యోత్తర పురాణం) Aditya Hrudaya stotram Telugu

ఆదిత్య హృదయ స్తోత్రం (భవిష్యోత్తర పురాణం)

 శ్రీగణేశాయ నమః ।

అథ ఆదిత్యహృదయమ్ ।
శతానీక ఉవాచ ।
కథమాదిత్యముద్యన్తముపతిష్ఠేద్విజోత్తమః ।
ఏతన్మేబ్రూహి విప్రేన్ద్ర ప్రపద్యే శరణం తవ ॥ ౧॥

సుమన్తురువాచ ।
ఇదమేవ పురా పృష్టః శఙ్ఖచక్రగదాధరః ।
ప్రణమ్య శిరసా దేవమర్జునేన మహాత్మనా ॥ ౨॥

కురుక్షేత్రే మహారాజప్రవృత్తే భారతే రణే ।
కృష్ణనాథం సమాసాద్య ప్రార్థయిత్వాబ్రవీదిదమ్ ॥ ౩॥

అర్జున ఉవాచ ।
జ్ఞానం చ ధర్మశాస్త్రాణాం గుహ్యాద్గుహ్యతరం తథా ।
మమ కృష్ణ పరిజ్ఞాతం వాఙ్మయం సచరాచరమ్ ॥ ౪॥

సూర్యస్తుతిమయం న్యాసం వక్తుమర్హసి మాధవ ।
భక్త్యా పృచ్ఛామి దేవేశ కథయస్వ ప్రసాదతః ॥ ౫॥

సూర్యభక్తిం కరిష్యామి కథం సూర్యం ప్రపూజయేత్ ।
తదహం శ్రోతుమిచ్ఛామి త్వత్ప్రసాదేన యాదవ ॥ ౬॥

శ్రీభగవానువాచ ।
రుద్రాదిదైవతైః సర్వైః పృష్టేన కథితం మయా ।
వక్ష్యేఽహం సూర్యవిన్యాసం శృణు పాణ్డవ యత్నతః ॥ ౭॥

అస్మాకం యత్త్వయా పృష్టమేకచిత్తో భవార్జున ।
తదహం సమ్ప్రవక్ష్యామి ఆదిమధ్యావసానకమ్ ॥ ౮॥

అర్జున ఉవాచ ।
నారాయణ సురశ్రేష్ఠ పృచ్ఛామి త్వాం మహాయశః ।
కథమాదిత్యముద్యన్తముపతిష్ఠేత్సనాతనమ్ ॥ ౯॥

శ్రీభగవానువాచ ।
సాధు పార్థ మహాబాహో బుద్ధిమానసి పాణ్డవ ।
యన్మాం పృచ్ఛస్యుపస్థానం తత్పవిత్రం విభావసోః ॥ ౧౦॥

సర్వమఙ్గలమాఙ్గల్యం సర్వపాపప్రణాశనమ్ ।
సర్వరోగప్రశమనమాయుర్వర్ధనముత్తమమ్ ॥ ౧౧॥

అమిత్రదమనం పార్థ సఙ్గ్రామే జయవర్ధనమ్ ।
వర్ధనం ధనపుత్రాణామాదిత్యహృదయం శృణు ॥ ౧౨॥

యచ్ఛ్రుత్వా సర్వపాపేభ్యో ముచ్యతే నాత్ర సంశయః ।
త్రిషు లోకేషు విఖ్యాతం నిఃశ్రేయసకరం పరమ్ ॥ ౧౩॥

దేవదేవం నమస్కృత్య ప్రాతరుత్థాయ చార్జున ।
విఘ్నాన్యనేకరూపాణి నశ్యన్తి స్మరణాదపి ॥ ౧౪॥

తస్మాత్సర్వప్రయత్నేన సూర్యమావాహయేత్ సదా ।
ఆదిత్యహృదయం నిత్యం జాప్యం తచ్ఛృణు పాణ్డవ ॥ ౧౫॥

యజ్జపాన్ముచ్యతే జన్తుర్దారిద్ర్యాదాశు దుస్తరాత్ ।
లభతే చ మహాసిద్ధిం కుష్ఠవ్యాధివినాశినీమ్ ॥ ౧౬॥

అస్మిన్మన్త్రే ఋషిశ్ఛన్దో దేవతాశక్తిరేవ చ ।
సర్వమేవ మహాబాహో కథయామి తవాగ్రతః ॥ ౧౭॥

మయా తే గోపితం న్యాసం సర్వశాస్త్రప్రబోధితమ్ ।
అథ తే కథయిష్యామి ఉత్తమం మన్త్రమేవ చ ॥ ౧౮॥

ఓం అస్య శ్రీఆదిత్యహృదయస్తోత్రమన్త్రస్య శ్రీకృష్ణ ఋషిః ।
శ్రీసూర్యాత్మా త్రిభువనేశ్వరో దేవతా అనుష్టుప్ఛన్దః ।
హరితహయరథం దివాకరం ఘృణిరితి బీజమ్ ।
ఓం నమో భగవతే జితవైశ్వానరజాతవేదసే ఇతి శక్తిః ।
ఓం నమో భగవతే ఆదిత్యాయ నమః ఇతి కీలకమ్ ।
ఓం అగ్నిగర్భదేవతా ఇతి మన్త్రః ।
ఓం నమో భగవతే తుభ్యమాదిత్యాయ నమోనమః ।
శ్రీసూర్యనారాయణప్రీప్యథం జపే వినియోగః ।
అథ న్యాసః ।
ఓం హ్రాం అఙ్గుష్ఠాభ్యాం నమః ।
ఓం హ్రీం తర్జనీభ్యాం నమః ।
ఓం హ్రూం మధ్యమాభ్యాం నమః ।
ఓం హ్రైం అనామికాభ్యాం నమః ।
ఓం హ్రౌం కనిష్ఠికాభ్యాం నమః ।
ఓం హ్రః కరతలకరపృష్ఠాభ్యాం నమః ।
ఓం హ్రాం హృదయాయ నమః ।
ఓం హ్రీం శిరసే స్వాహా ।
ఓం హ్రూం శిఖాయ వషట్ ।
ఓం హ్రైం కవచాయ హుమ్
ఓం హ్రౌం నేత్రత్రయాయ వౌషట్ ।
ఓం హ్రః అస్త్రాయ ఫట్ ।
ఓం హ్రాం హ్రీం హ్రూం హ్రైం హ్రౌం హ్రః ఇతి దిగ్బన్ధః ॥

అథ ధ్యానమ్ ॥

భాస్వద్రత్నాఢ్యమౌలిః స్ఫురదధరరుచా రఞ్జితశ్చారుకేశో
    భాస్వాన్యో దివ్యతేజాః కరకమలయుతః స్వర్ణవర్ణః ప్రభాభిః ।
విశ్వాకాశావకాశగ్రహపతిశిఖరే భాతి యశ్చోదయాద్రౌ
    సర్వానన్దప్రదాతా హరిహరనమితః పాతు మాం విశ్వచక్షుః ॥ ౧॥

పూర్వమష్టదలం పద్మం ప్రణవాదిప్రతిష్ఠితమ్ ।
మాయాబీజం దలాష్టాగ్రే యన్త్రముద్ధారయేదితి ॥ ౨॥

ఆదిత్యం భాస్కరం భానుం రవిం సూర్యం దివాకరమ్ ।
మార్తణ్డం తపనం చేతి దలేష్వష్టసు యోజయేత్ ॥ ౩॥

దీప్తా సూక్ష్మా జయా భద్రా విభూతిర్విమలా తథా ।
అమోఘా విద్యుతా చేతి మధ్యే శ్రీః సర్వతో ముఖీ ॥ ౪॥

సర్వజ్ఞః సర్వగశ్చైవ సర్వకారణదేవతా ।
సర్వేశం సర్వహృదయం నమామి సర్వసాక్షిణమ్ ॥ ౫॥

సర్వాత్మా సర్వకర్తా చ సృష్టిజీవనపాలకః ।
హితః స్వర్గాపవర్గశ్చ భాస్కరేశ నమోఽస్తు తే ॥ ౬॥

ఇతి ప్రార్థనా ॥

నమో నమస్తేఽస్తు సదా విభావసో సర్వాత్మనే సప్తహయాయ భానవే ।
అనన్తశక్తిర్మణిభూషణేన దదస్వ భుక్తిం మమ ముక్తిమవ్యయామ్ ॥ ౭॥

అర్కం తు మూర్ధ్ని విన్యస్య లలాటే తు రవిం న్యసేత్ ।
విన్యసేన్నేత్రయోః సూర్యం కర్ణయోశ్చ దివాకరమ్ ॥ ౮॥

నాసికాయాం న్యసేద్భానుం ముఖే వై భాస్కరం న్యసేత్ ।
పర్జన్యమోష్ఠయోశ్చైవ తీక్ష్ణం జిహ్వాన్తరే న్యసేత్ ॥ ౯॥

సువర్ణరేతసం కణ్ఠే స్కన్ధయోనితగ్మతేజసమ్ ।
బాహ్వోస్తు పూషణం చైవ మిత్రం వై పృష్ఠతో న్యసేత్ ॥ ౧౦॥

వరుణం దక్షిణే హస్తే త్వష్టారం వామతః కరే ।
హస్తావుష్ణకరః పాతు హృదయం పాతు భానుమాన్ ॥ ౧౧॥

ఉదరే తు యమం విద్యాదాదిత్యం నాభిమణ్డలే ।
కట్యాం తు విన్యసేద్ధంసం రుద్రమూర్వోస్తు విన్యసేత్ ॥ ౧౨॥

జాన్వోస్తు గోపతిం న్యస్య సవితారం జఙ్ఘయోః ।
పాదయోశ్చ వివస్వన్తం గుల్ఫయోశ్చ దివాకరమ్ ॥ ౧౩॥

బాహ్యతస్తు తమోధ్వంస భగమభ్యన్తరే న్యసేత్ ।
సర్వాఙ్గేషు సహస్రాంశుం దిగ్విదిక్షు భగ న్యసేత్ ॥ ౧౪॥

ఇతి దిగ్బన్ధః ।
ఏష ఆదిత్యవిన్యాసో దేవానామపిదుర్లభః ।
ఇమం భక్త్యా న్యసేత్పార్థ స యాతి పరమాం గతిమ్ ॥ ౧౫॥

కామక్రోధకృతాత్పాపాన్ముచ్యతే నాత్ర సంశయః ।
సర్పాదపి భయం నైవ సఙ్గ్రామేషు పథిష్వపి ॥ ౧౬॥

రిపుసఙ్ఘట్టకాలేషు తథా చోరసమాగమే ।
త్రిసన్ధ్యం జపతో న్యాస మహాపాతకనాశనమ్ ॥ ౧౭॥

విస్ఫోటకసముత్పన్న తీవ్రజ్వరసభుద్భవమ్ ।
శిరోరోగం నేత్రరోగం సర్వవ్యాధివినాశనమ్ ॥ ౧౮॥

కుష్ఠవ్యాధిస్తథా దద్రురోగాశ్చ వివిధాశ్చ యే ।
జపమానస్య నశ్యన్తి శృణు భక్త్యా తదర్జున ॥ ౧౯॥

ఆదిత్యో మన్త్రసంయుక్త ఆదిత్యో భువనేశ్వరః ।
ఆదిత్యాన్నాపరో దేవో హ్యాదిత్యః పరమేశ్వరః ॥ ౨౦॥

ఆదిత్యమర్చయేద్బ్రహ్మా శివ ఆదిత్యమర్చయేత్ ।
యదాదిత్యమయం తేజో మమ తేజత్తదర్జున ॥ ౨౧॥

ఆదిత్యం మన్త్రసంయుక్తమాదిత్యం భువనేశ్వరమ్ ।
ఆదిత్యం యే ప్రపశ్యన్తి మాం పశ్యన్తి న సంశయః ॥ ౨౨॥

త్రిసన్ధ్యమర్చయేత్సూర్యం స్మరేద్భక్త్యా తు యో నరః ।
న స పశ్యతి దారిద్ర్యం జన్మజన్మని చార్జున ॥ ౨౩॥

ఏతత్తే కథితం పార్థ ఆదిత్యహృదయం మయా ।
శృణవన్ముక్తశ్చ పాపేభ్యః సూర్యలోకే మహీయతే ॥ ౨౪॥

నమో భగవతే తుభ్యమాదిత్యాయ నమో నమః ।
ఆదిత్యః సవితా సూర్యః ఖగః పూషా గభస్తిమాన్ ॥ ౨౫॥

సువర్ణః స్ఫటికో భానుః స్ఫురితో విశ్వతాపనః ।
రవిర్విశ్వో మహాతేజాః సువర్ణః సుప్రబోధకః ॥ ౨౬॥

హిరణ్యగర్భస్త్రిశిరాస్తపనో భాస్కరో రవిః ।
మార్తణ్డో గోపతిః శ్రీమాన్ కృతజ్ఞశ్చ ప్రతాపవాన్ ॥ ౨౭॥

తమిస్రహా భగో హంసో నాసత్యశ్చ తమోనుదః ।
శుద్ధో విరోచనః కేశీ సహస్రాంశుర్మహాప్రభుః ॥ ౨౮॥

వివస్వాన్పూషణో మృత్యుర్మిహిరో జామదగ్న్యజిత్ ।
ధర్మరశ్మిఃపతఙ్గశ్చ శరణ్యో మిత్రహా తపః ॥ ౨౯॥

దుర్విజ్ఞేయగతిః శూరస్తేజోరశ్మిర్మహాయశాః ।
శమ్భుశ్చిత్రాఙ్గదః సౌమ్యో హవ్యకవ్యప్రదాయకః ॥ ౩౦॥

అంశుమానుత్తమో దేవ ఋగ్యజుఃసామ ఏవ చ ।
హరిదశ్వస్తమోదారః సప్తసప్తిర్మరీచిమాన్ ॥ ౩౧॥

అగ్నిగర్భోఽద్రితేః పుత్రః శమ్భుస్తిమిరనాశనః ।
పూషా విశ్వమ్భరో మిత్రః సువర్ణః సుప్రతాపవాన్ ॥ ౩౨॥

ఆతపీ మణ్డలీ భాస్వాంస్తపనః సర్వతాపనః ।
కృతవిశ్వో మహాతేజః సర్వరత్నమయోద్భవః ॥ ౩౩॥

అక్షరశ్చ క్షరశ్చైవ ప్రభాకరవిభాకరౌ ।
చన్ద్రశ్చన్ద్రాఙ్గదః సౌమ్యో హవ్యకవ్యప్రదాయకః ॥ ౩౪॥

అఙ్గారకో గదోఽగస్తీ రక్తాఙ్గశ్చాఙ్గవర్ధనః ।
బుధో బుద్ధాసనో బుద్ధిర్బుద్ధాత్మబుద్ధివర్ధనః ॥ ౩౫॥

బృహద్భానుర్బృహద్భాసో బృహద్ధామా బృహస్పతిః ।
శుక్లస్త్వం శుక్లరేతాస్త్వం శుక్లాఙ్గః శుక్లభూషణః ॥ ౩౬॥

శనిమాన్ శనిరూపస్త్వం శనైర్గచ్ఛసి సర్వదా ।
అనాదిరాదిరాదిత్యస్తేజోరాశిర్మహాతపాః ॥ ౩౭॥

అనాదిరాదిరూపస్త్వమాదిత్యో దిక్పతిర్యమః ।
భానుమాన్ భానురూపస్త్వం స్వర్భానుర్భానుదీతిమాన్ ॥ ౩౮॥

ధూమ్రకేతుర్మహాకేతుః సర్వకేతురనుత్తమః ।
తిమిరావరణః శమ్భుః స్త్రష్టా మార్తణ్డఏవ చ ॥ ౩౯॥

నమః పూర్వాయ గిరయే పశ్చిమాయ నమో నమః ।
నమోత్తరాయ గిరయే దక్షిణాయ నమో నమః ॥ ౪౦॥

నమో నమః సహస్రాంశో హ్యాదిత్యాయ నమో నమః ।
నమఃపద్మప్రబోధాయ నమస్తే ద్వాదశాత్మనే ॥ ౪౧॥

నమో విశ్వప్రబోధాయ నమో భ్రాజిష్ణుజిష్ణవే ।
జ్యోతిషే చ నమస్తుభ్యం జ్ఞానాకార్య నమో నమః ॥ ౪౨॥

ప్రదీప్తాయ ప్రగల్భాయ యుగాన్తాయ నమో నమః ।
నమస్తే హోతృపతయే పృథివీపతయే నమః ॥ ౪౩॥

నమోఙ్కార వషట్కార సర్వయజ్ఞ నమోఽస్తు తే ।
ఋగ్వేదాయ యజుర్వేద సామవేద నమోఽస్తు తే ॥ ౪౪॥

నమో హాటకవర్ణాయ భాస్కరాయ నమో నమః ।
జయాయ జయభద్రాయ హరిదశ్వాయ తే నమః ॥ ౪౫॥

దివ్యాయ దివ్యరూపాయ గ్రహాణాం పతయే నమః ।
నమస్తే శుచయే నిత్యం నమః కురుకులాత్మనమ్ ॥ ౪౬॥

నమస్త్రైలోక్యనాథాయ భూతానాం పతయే నమః ।
నమః కైవల్యనాథాయ నమస్తే దివ్యచక్షుషే ॥ ౪౭॥

త్వం జ్యోతిస్త్వం ద్యుతిర్బ్రహ్మా త్వం విష్ణుస్త్వం ప్రజాపతిః ।
త్వమేవ రుద్రో రుద్రాత్మా వాయురగ్నిస్త్వమేవ చ ॥ ౪౮॥

యోజనానాం సహస్రే ద్వే శతే ద్వే ద్వే చ యోజనే ।
ఏకేన నిమిషార్ధేన క్రమమాణ నమోఽస్తు తే ॥ ౪౯॥

నవయోజనలక్షాణి సహస్రద్విశతాని చ ।
యావద్ధటీప్రమాణేన క్రమమాణ నమోఽస్తు తే ॥ ౫౦॥

అగ్రతశ్చ నమస్తుభ్యం పృష్ఠతశ్చ సదా నమః ।
పార్శ్వతశ్చ నమస్తుభ్యం నమస్తే చాస్తు సర్వదా ॥ ౫౧॥

నమః సురారిహన్త్రే చ సోమసూర్యాగ్నిచక్షుషే ।
నమో దివ్యాయ వ్యోమాయ సర్వతన్త్రమయాయ చ ॥ ౫౨॥

నమో వేదాన్తవైద్యాయ సర్వకర్మాదిసాక్షిణే ।
నమో హరితవర్ణాయ సువర్ణాయ నమో నమః ॥ ౫౩॥

అరుణో మాఘమాసే తు సూర్యో వై ఫాల్గునే తథా ।
చైత్రమాసే తు వేదాఙ్గో భానుర్వైశాఖతాపనః ॥ ౫౪॥

జ్యేష్ఠమాసే తపేదిన్ద్ర ఆషాఢే తపతే రవిః ।
గభస్తిః శ్రావణే మాసి యమో భాద్రపదే తథా ॥ ౫౫॥

ఇషే సువర్ణరేతాశ్చ కార్తికే చ దివాకరః ।
మార్గశీర్షే తపేన్మిత్రః పౌషే విష్ణుః సనాతనః ॥ ౫౬॥

పురుషస్త్వధికే మాసి మాసాధిక్యే తు కల్పయేత్ ।
ఇత్యేతే ద్వాదశాదిత్యాః కాశ్యపేయాః ప్రకీర్తితాః ॥ ౫౭॥

ఉగ్రరూపా మహాత్మానస్తపన్తే విశ్వరూపిణః ।
ధర్మార్థకామమోక్షాణాం ప్రస్ఫుటా హేతవో నృప ॥ ౫౮॥

సర్వపాపహరం చైవమాదిత్యం సమ్ప్రపూజయేత్ ।
ఏకధా దశధా చైవ శతధా చ సహస్రధా ॥ ౫౯॥

తపన్తే విశ్వరూపేణ సృజన్తి సంహరన్తి చ ।
ఏష విష్ణుః శివశ్చైవ బ్రహ్మా చైవ ప్రజాపతిః ॥ ౬౦॥

మహేన్ద్రశ్చైవ కాలశ్చ యమో వరుణ ఏవ చ ।
నక్షత్రగ్రహతారాణామధిపో విశ్వతాపనః ॥ ౬౧॥

వాయురగ్నిర్ధనాధ్యక్షో భూతకర్తా స్వయం ప్రభుః ।
ఏష దేవో హి దేవానాం సర్వమాప్యాయతే జగత్ ॥ ౬౨॥

ఏష కర్తా హి భూతానాం సంహర్తా రక్షకస్తథా ।
ఏష లోకానులోకాశ్చ సప్తద్వీపాశ్చ సాగరాః ॥ ౬౩॥

ఏష పాతాలసప్తస్థా దైత్యదానవరాక్షసాః ।
ఏష ధాతా విధాతా చ బీజం క్షేత్రం ప్రజాపతిః ॥ ౬౪॥

ఏష ఏవ ప్రజా నిత్యం సంవర్ధయతి రశ్మిభిః ।
ఏష యజ్ఞః స్వధా స్వహా హ్రీః శ్రీశ్చ పురుషోత్తమః ॥ ౬౫॥

ఏష భూతాత్మకో దేవః సూక్ష్మోఽవ్యక్తః సనాతనః ।
ఈశ్వరః సర్వభూతానాం పరమేష్ఠీ ప్రజాపతిః ॥ ౬౬॥

కాలాత్మా సర్వభూతాత్మా వేదాత్మా విశ్వతోముఖః ।
జన్మమృత్యుజరావ్యాధిసంసారభయనాశనః ॥ ౬౭॥

దారిద్ర్యవ్యసనధ్వంసీ శ్రీమాన్దేవో దివాకరః ।
కీర్తనీయో వివస్వాంశ్చ మార్తణ్డో భాస్కరో రవిః ॥ ౬౮॥

లోకప్రకాశకః శ్రీమాఁల్లోకచక్షుర్గ్రహేశ్వరః ।
లోకసాక్షీ త్రిలోకేశః కర్తా హర్తా తమిస్రహా ॥ ౬౯॥

తపనస్తాపనశ్చైవ శుచిః సప్తాశ్వవాహనః ।
గభస్తిహస్తో బ్రహ్మణ్యః సర్వదేవనమస్కృతః ॥ ౭౦॥

ఆయురారోగ్యమైశ్వర్యం నరా నార్యశ్చ మన్దిరే ।
యస్య ప్రసాదాత్సన్తుష్టిరాదిత్యహృదయం జపేత్ ॥ ౭౧॥

ఇత్యేనైర్నామభిః పార్థ ఆదిత్యం స్తౌతి నిత్యశః ।
ప్రాతరుత్థాయ కౌన్తేయ తస్య రోగభయం నహి ॥ ౭౨॥

పాతకాన్ముచ్యతే పార్థ వ్యాధిభ్యశ్చ న సంశయః ।
ఏకసన్ధ్యం ద్విసన్ధ్యం వా సర్వపాపైః ప్రముచ్యతే ॥ ౭౩॥

త్రిసన్ధ్యం జపమానస్తు పశ్యేశ్చ పరమం పదమ్ ।
యదహ్నాత్కురుతే పాపం తదహ్నాత్ప్రతిముచ్యతే ॥ ౭౪॥

యద్రాత్ర్యాత్కురుతే పాపం తద్రాత్ర్యాత్ప్రతిముచ్యతే ।
దద్రుస్ఫోటకకుష్ఠాని మణ్డలాని విషూచికా ॥ ౭౫॥

సర్వవ్యాధిమహారోగభూతబాధాస్తథైవ చ ।
డాకినీ శాకినీ చైవ మహారోగభయం కుతః ॥ ౭౬॥

యే చాన్యే దుష్టగేగాశ్చ జ్వరాతీసారకాదయః ।
జపమానస్య నశ్యన్తి జీవేచ్చ శరదాం శతమ్ ॥ ౭౭॥

సంవత్సరేణ మరణం యదా తస్య ధ్రువం భవేత్ ।
అశీర్షాం పశ్యతిచ్ఛాయామహోరాత్రం ధనఞ్జయ ॥ ౭౮॥

యస్త్విదం పఠతే భక్త్యా భానోర్వారే మహాత్మనః ।
ప్రాతఃస్నానే కృతే పార్థ ఏకాగ్రకృతమానసః ॥ ౭౯॥

సువర్ణచక్షుర్భవతి న చాన్ధస్తు ప్రజాయతే ।
పుత్రవాన్ ధనసమ్పన్నో జాయతే చారుజః సుఖీ ॥ ౮౦॥

సర్వసిద్ధిమవాప్నోతి సర్వత్ర విజయీ భవేత ।
ఆదిత్యహృదయం పుణ్యం సూర్యనామవిభూషితమ్ ॥ ౮౧॥

శ్రుత్వా చ నిఖిలం పార్థ సర్వపాపైః ప్రముచ్యతే ।
అతః పరతరం నాస్తి సిద్ధికామస్య పాణ్డవ ॥ ౮౨॥

ఏతజ్జపస్వ కౌన్తేయ యేన శ్రేయో హ్యవాప్స్యసి ।
ఆదిత్యహృదయం నిత్యం యః పఠేత్సుసమాహితః ॥ ౮౩॥

భ్రూణహా ముచ్యతే పాపాత్కృతఘ్నో బ్రహ్మఘాతకః ।
గోఘ్నః సురాపో దుర్భోజీ దుష్ప్రతిగ్రహకారకః ॥ ౮౪॥

పాతకాని చ సర్వాణి దహత్యేవ న సంశయః ।
య ఇదం శృణుయాన్నిత్య జపేద్వాఽపి సమాహితః ॥ ౮౫॥

సర్వపాపవిశుద్ధాత్మా సూర్యలోకే మహీయతే ।
అపుత్రో లభతే పుత్రాన్నిర్ధనో ధనమాప్నుయాత్ ॥ ౮౬॥

కురోగీ ముచ్యతే రోగాద్భక్త్యా యః పఠతే సదా ।
యస్త్వాదిత్యదినే పార్థ నాభిమాత్రజలే స్థితః ॥ ౮౭॥

ఉదయాచలమారూఢం భాస్కరం ప్రణతః స్థితః ।
జపతే మానవో భక్త్యా శృణుయాద్వాపి భక్తితః ॥ ౮౮॥

స యాతి పరమం స్థానం యత్ర దేవో దివాకరః ।
అమిత్రదమనం పార్థ యదా కర్తుం సమారభేత్ ॥ ౮౯॥

తదా ప్రతికృతిం కృత్వా శత్రోశ్చరణపాంసుభిః ।
ఆక్రమ్య వామపాదేన హ్యాదిత్యహృదయం జపేత్ ॥ ౯౦॥

ఏతన్మన్త్రం సమాహూయ సర్వసిద్ధికరం పరమ్ ।
ఓం హ్రీం హిమాలీఢం స్వాహా । ఓం హ్రీం నిలీఢం స్వాహా ।
ఓం హ్రీం మాలీఢం స్వాహా । ఇతి మన్త్రః ।
త్రిభిశ్చ రోగీ భవతి జ్వరీ భవతి పఞ్చభిః ।
జపైస్తు సప్తభిః పార్థ రాక్షసీం తనుమావిశేత ॥ ౯౧॥

రాక్షససేనాభిభూతస్య వికారాన్ శృణు పాణ్డవ ।
గీయతే నృత్యతే నగ్న ఆస్ఫోటయతి ధావతి ॥ ౯౨॥

శివారుతం చ కురుతే హసతే క్రన్దతే పునః ।
ఏవం సమ్పీడ్యతే పార్థ యద్యపి స్యాన్మహేశ్వరః ॥ ౯౩॥

కిం పునర్మానుషః కశ్చిచ్ఛౌచాచారవివర్జితః ।
పీడితస్య న సన్దేహో జ్వరౌ భవతి దారుణః ॥ ౯౪॥

యదా చానుగ్రహం తస్య కర్తుమిచ్ఛేచ్ఛుభఙ్కరమ్ ।
తదా సలిలమాదాయ జపేన్మన్త్రమిమం బుధః ॥ ౯౫॥

నమో భగవతే తుభ్యమాదిత్యాయ నమో నమః ।
జయాయ జయభద్రాయ హరిదశ్వాయ తే నమః ॥ ౯౬॥

స్నాపయేత్తేన మన్త్రేణ శుభం భవతి నాన్యథా ।
అన్యథా చ భవేద్దోషో నశ్యతే నాత్ర సంశయః ॥ ౯౭॥

అతస్తే నిఖిలః ప్రోక్తః పూజాం చైవ నిబోధ మే ।
ఉపలిప్తే శుచౌ దేశే నియతో వాగ్యతాః శుచిః ॥ ౯౮॥

వృత్తం వా చతురస్రం వా లిప్తభూమౌ లిఖేచ్ఛచి ।
త్రిధా తత్ర లిఖేత్పద్మమష్టపత్రం సకర్ణికమ్ ॥ ౯౯॥

అష్టపత్రంలిఖేత్పద్మం లిప్తగోమయమణ్డలే ।
పూర్వపత్రే లిఖేత్ సూర్యమాగ్నేయ్యాం తు రవిం న్యసేత్ ॥ ౧౦౦॥

యామ్యాయాం చ వివస్వన్తం నైఋర్త్యాం తు భగం న్యసేత్ ।
ప్రతీచ్యాం వరుణం విద్యాద్వాయవ్యాం మిత్రమేవ చ ॥ ౧౦౧॥

ఆదిత్యముత్తరే పత్రే ఈశాన్యాం మిత్రమేవ చ ।
మధ్యే తు భాస్కరం విద్యాత్క్రమేణైవం సమర్చయేత్ ॥ ౧౦౨॥

అతః పరతరం నాస్తి సిద్ధికామస్య పాణ్డవ ।
మహాతేజః సముద్యతం ప్రణమేత్స కృతాఞ్జలిః ॥ ౧౦౩॥

సకేసరాణి పద్మాని కరవీరాణి చార్జున ।
తిలతణ్ద్గులయుక్తాని కుశగన్ధోదకాని చ ॥ ౧౦౪॥

రక్తచన్దనమిశ్రాణి కృత్వా వై తామ్రభాజనే ।
ధృత్వా శిరసి తత్పాత్రం జానుభ్యాం ధరణీం స్పృశేత్ ॥ ౧౦౫॥

మన్త్రపూతం గుడాకేశః చార్ఘ్యం దద్యాద్గభస్తయే ।
సాయుధం సరథం చైవ సూర్యమావాహయామ్యహమ్ ॥ ౧౦౬॥

స్వాగతో భవ ।
సుప్రతిష్ఠితో భవ ।
సన్నిధౌ భవ ।
సన్నిహితో భవ ।
సమ్ముఖో భవ ।
ఇతి పఞ్చముద్రాః ।
స్ఫుటయిత్వాఽర్హయేత్సూర్యం భుక్తి ముక్తిం లభేన్నరః ॥ ౧౦౭॥

ఓం శ్రీం విద్యా కిలికిలికటకేష్టసర్వార్థసాధనాయ స్వాహా ।
ఓం శ్రీం హ్రీం హ్రూం హంసః సూర్యాయ నమః స్వాహా ।
ఓం శ్రీం హ్రాం హ్రీం హ్రూం హ్రః సూర్యమూర్తయే స్వాహా ।
ఓం శ్రీం హ్రీం ఖం ఖః లోకాయ సూర్యమూర్తయే స్వాహా ।
ఓం హ్రూం మార్తణ్డాయ స్వాహా ।
నమోఽస్తు సూర్యాయ సహస్రభానవే నమోఽస్తు వైశ్వానరజాతవేదసే ।
త్వమేవ చార్ఘ్యం ప్రతిగృహ్ణ దేవ దేవాధిదేవాయ నమో నమస్తే ॥ ౧౦౮॥

నమో భగవతే తుభ్యం నమస్తే జాతవేదసే ।
దత్తమర్ఘ్యం మయా భానో త్వం గృహాణ నమోఽస్తు తే ॥ ౧౦౯॥

ఏహి సూర్య సహస్రాంశో తేజోరాశే జగత్పతే ।
అనుకమ్పయ మాం దేవ గృహాణార్ఘ్యం నమోఽస్తుతే ॥ ౧౧౦॥

నమో భగవతే తుభ్యం నమస్తే జాతవేదసే ।
మమేదమర్ఘ్యం గృహ్ణ త్వం దేవదేవ నమోఽస్తు తే ॥ ౧౧౧॥

సర్వదేవాధిదేవాయ ఆధివ్యాధివినాశినే ।
ఇదం గృహాణ మే దేవ సర్వవ్యాధిర్వినశ్యతు ॥ ౧౧౨॥

నమః సూర్యాయ శాన్తాయ సర్వరోగవినాశినే ।
మమేప్సితం ఫలం దత్త్వా ప్రసీద పరమేశ్వర ॥ ౧౧౩॥

ఓం నమో భగవతే సూర్యాయ స్వాహా । ఓం శివాయ స్వాహా ।
ఓం సర్వాత్మనే సూర్యాయనమః స్వాహా । ఓం అక్షయ్యతేజసేనమః స్వాహా ।
సర్వసఙ్కటదారిద్రయం శత్రుం నాశయ నాశయ ।
సర్వలోకేషు విశ్వాత్మన్సర్వాత్మన్సర్వదర్శక ॥ ౧౧౪॥

నమో భగవతే సూర్య కుష్ఠరోగాన్విఖణ్డయ ।
ఆయురారోగ్యమైశ్వర్యం దేహి దేవ నమోఽస్తు తే ॥ ౧౧౫॥

నమో భగవతే తుభ్యమాదిత్యాయ నమో నమః ।
ఓం అక్షయ్యతేజసే నమః ।
ఓం సూర్యాయ నమః ।
ఓం విశ్వమూర్తయే నమః ।
ఆదిత్యం చ శివం విద్యాచ్ఛివమాదిత్యరూపిణమ్ ।
ఉభయోరన్తరం నాస్తి ఆదిత్యస్య శివస్య చ ॥ ౧౧౬॥

ఏతదిచ్ఛామ్యహం శ్రోతుం పురూషో వై దివాకరః ।
ఉదయే బ్రాహ్మణో రూపం మధ్యాహ్నే తు మహేశ్వరః ॥ ౧౧౭॥

అస్తమానే స్వయం విష్ణుస్త్రిమూర్తిశ్చ దివాకరః ।
నమో భగవతే తుభ్యం విష్ణవే ప్రభవిష్ణవే ॥ ౧౧౮॥

మమేదమర్ఘ్యం ప్రతిగృహ్ణ దేవ దేవాధిదేవాయ నమో నమస్తే ।
శ్రీసూర్యనారాయణాయ సాఙ్గాయ సపరివారాయ ఇదమర్ఘ్యం సమర్పయామి ॥ ౧౧౯॥

హిమఘ్నాయ తమోఘ్నాయ రక్షోఘ్నాయ చ తే నమః ।
కృతఘ్నాయ సత్యాయ తస్మై సూయార్త్మనే నమః ॥ ౧౨౦॥

జయోఽజయశ్చ విజయో జితప్రాణో జితశ్రమః ।
మనోజవో జితక్రోధో వాజినః సప్త కీర్తితాః ॥ ౧౨౧॥

హరితహయరథం దివాకరం కనకమయామ్బుజరేణుపిఞ్జరమ్ ।
ప్రతిదినముదయే నవం శరణముపైమి హిరణ్యరేతసమ్ ॥ ౧౨౨॥

న తం వ్యాలాః ప్రబాధన్తే న వ్యాధిభ్యోభయం భవేత్ ।
న నాగేభ్యో భయం చైవ నచ భూతభయం క్వచిత్ ॥ ౧౨౩॥

అగ్నిశత్రుభయం నాస్తి పార్థివేభ్యస్తథైవ చ ।
దుర్గతిం తరతే ఘోరాం ప్రజాం చ లభతే పశూన్ ॥ ౧౨౪॥

సిద్ధికామో లభేత్సిద్ధిం కన్యాకామస్తు కన్యకామ్ ।
ఏతత్పఠేత్స కౌన్తేయ భక్తియుక్తేన చేతసా ॥ ౧౨౫॥

అశ్వమేధసహస్రస్య వాజపేయశతస్య చ ।
కన్యాకోటిసహస్రస్య దత్తస్య ఫలమాప్నుయాత్ ॥ ౧౨౬॥

ఇదమాదిత్యహృదయం యోఽధీతే సతనం నరః ।
సర్వపాపవిశుద్ధాత్మా సూర్యలోకే మహీయతే ॥ ౧౨౭॥

నాస్త్యాదిత్యసమో దేవో నాస్త్యాదిత్యసమా గతిః ।
ప్రత్యక్షో భగవన్విష్ణుర్యేన విశ్వం ప్రతిష్ఠితమ్ ॥ ౧౨౮॥

నవతిర్యోజనం లక్షం సహస్రాణి శతాని చ ।
యావద్ఘటీప్రమాణేన తావచ్చరతి భాస్కరః ॥ ౧౨౯॥

గవాం శతసహస్రస్య సమ్యగ్దత్తస్య యత్ఫలమ్ ।
తత్ఫలం లభతే విద్వాఞ్శాన్తాత్మా స్తౌతి యో రవిమ్ ॥ ౧౩౦॥

యోఽధీతే సూర్యహృదయం సకలం సఫలం భవేత్ ।
అష్టానాం బ్రాహ్మణానాం చ లేఖయిత్వా సమర్పయేత్ ॥ ౧౩౧॥

బ్రహ్మలోకే ఋషీణాం చ జాయతే మానుషోఽపి వా ।
జాతిస్మరత్వమాప్నోతి శుద్ధాత్మా నాత్ర సంశయః ॥ ౧౩౨॥

అజాయ లోకత్రయపావనాయ భూతాత్మనే గోపతయే వృషాయ ।
సూర్యాయ సర్వప్రలయాన్తకాయ నమో మహాకారుణికోత్తమాయ ॥ ౧౩౩॥

వివస్వతే జ్ఞానమృదన్తరాత్మనే జగత్ప్రదీపాయ గజద్ధితైషిణే ।
స్వయమ్భువే దీప్తసహస్రచక్షుషే సురోత్తమాయామితతేజసే నమః ॥ ౧౩౪॥

సురైరనేకైః పరిషేవితాయ హిరణ్యగర్భాయ హిరణ్మయాయ ।
మహాత్మనే మోక్షపదాయ నిత్యం నమోఽస్తు తే వాసరకారణాయ ॥ ౧౩౫॥

ఆదిత్యశ్చార్చితో దేవ ఆదిత్యః పరమం పదమ్ ।
ఆదిత్యో మాతృకో భూత్వా ఆదిత్యో వాఙ్మయ జగత్ ॥ ౧౩౬॥

ఆదిత్యం పశ్యతే భక్త్యా మాం పశ్యతి ధ్రువం నరః ।
నాదిత్యం పశ్యతే భక్త్యా న స పశ్యతి మాం నరః ॥ ౧౩౭॥

త్రిగుణం చ త్రితత్త్వం చ త్రయో దేవాస్త్రయోఽగ్నయః ।
త్రయాణాం చ త్రిమూర్తిస్త్వం తురీయస్త్వం నమోఽస్తు తే ॥ ౧౩౮॥

నమః సవిత్రే జగదేక చక్షుషే జగత్ప్రసూతిస్థితినాశహేతవే ।
త్రయీమథాయ త్రిగుణాత్మధారిణే విరిఞ్చినారాయణశఙ్కరాత్మనే ॥ ౧౩౯॥

యస్యోదయేనేహ జగత్ప్రబుద్ధ్యతే ప్రవర్తతే చాఖిలకర్మసిద్ధయే ।
బ్రహ్మేన్ద్రనారాయణరుద్రవన్దితః స నః సదా యచ్ఛతు మఙ్గలం రవిః ॥ ౧౪౦॥

నమోఽస్తు సూర్యాయ సహస్రరశ్మయే సహస్రశాఖాన్వితసమ్భవాత్మనే ।
సహస్రయోగోద్భవభావభాగినే సహస్రసఙ్ఖ్యాయుగధారిణే నమః ॥ ౧౪౧॥

యత్మణ్డలం దీతికరం విశాలం రత్నప్రభం తీవ్రమనాదిరూపమ్ ।
దారిద్ర్యదుఃఖక్షయకారణం చ పునాతు మాం తత్సవితుర్వరేణ్యమ్ ॥ ౧౪౨॥

యన్మణ్డలం దేవగణైః సుపూజితం విప్రైః స్తుతమ్భావనముక్తికోవిదమ్ ।
తం దేవదేవం ప్రణమామి సూర్యం పునాతు మాం తత్సవితుర్వరేణ్యమ్ ॥ ౧౪౩॥

యన్మణ్డలం జ్ఞానఘనం త్వగమ్యం త్రైలోక్యపూజ్యం త్రిగుణాత్మరూపమ్ ।
సమస్తతేజోమయదివ్యరూపం పునాతు మాం తత్సవితుర్వరేణ్యమ్ ॥ ౧౪౪॥

యన్మణ్డలం గూఢమతిప్రబోధం ధర్మస్య వృద్ధిం కురుతే జనానామ్ ।
యత్సర్వపాపక్షయకారణం చ పునాతు మాం తత్సవితుర్వరేణ్యమ్ ॥ ౧౪౫॥

యన్మణ్డలం వ్యాధి వినాశదక్షం యదృగ్యజుః సామసు సమ్ప్రగీతమ్ ।
ప్రకాశితం యేన చ  భూర్భువఃస్వః పునాతు మాం తత్సవితువరేణ్యమ్ ॥ ౧౪౬॥

యన్మణ్డలం వేదవిదో వదన్తి గాయన్తి యచ్చారణ సిద్ధసఙ్ఘాః ।
యద్యోగినో యోగజుషాం చ సఙ్ఘాః పునాతు మాం తత్సవితుర్వరేణ్యమ్ ॥ ౧౪౭॥

యన్మణ్డలం సర్వజనేషు పూజితం జ్యోతిశ్చ కుర్యాదిహ మర్త్యలోకే ।
యత్కాలకాలాదిమనాదిరూపం పునాతు మాం తత్సవితుర్వరేణ్యమ్ ॥ ౧౪౮॥

యన్మణ్డలం విష్ణుచతుర్ముఖాఖ్యం యదక్షరం పాపహారం జనానామ్ ।
యత్కాలకల్పక్షయకారణం చ పునాతు మాం తత్సవితుర్వరేణ్యమ్ ॥ ౧౪౯॥

యన్మణ్డలం విశ్వసృజాం ప్రసిద్ధముత్పత్తిరక్షామ్ప్రలయప్రగల్భమ్ ।
యస్మిఞ్జగత్సంహరతేఽఖిలం చ పునాతు మాం తత్సవితుర్వరేణ్యమ్ ॥ ౧౫౦॥

యన్మణ్డలం సర్వగతస్య విష్ణోరాత్మా పరం ధామ విశుద్ధతత్త్వమ్ ।
సూక్ష్మాన్తరైర్యోగపథానుగమ్యం పునాతు మాం తత్సవితుర్వరేణ్యమ్ ॥ ౧౫౧॥

యన్మణ్డలం బ్రహ్మవిదో వదన్తి గాయన్తి యచ్చారణసిద్ధసఙ్ఘాః ।
యన్మణ్డలం వేదవిదః స్మరన్తి పునాతు మాం తత్సవితుర్వరేణ్యమ్ ॥ ౧౫౨॥

యన్మణ్డలం వేదవిదోపగీతం యద్యోగినాం యోగపథాతుగమ్యమ్ ।
తత్సర్వవేదం ప్రణమామి సూర్యం పునాతు మాం తత్సవితుర్వరేణ్యమ్ ॥ ౧౫౩॥

మణ్డలాష్టమిదం పుణ్యం యః పఠేత్సతతం నరః ।
సర్వపాపవిశుద్ధాత్మా సూర్యలోకే మహీయతే ॥ ౧౫౪॥

ధ్యేయః సదాసవితృమణ్డలమధ్యవర్తీ నారాయణః సరసిజాసన సన్నివిష్టః ।
కేయూరవాన్మకరకుణ్డలవాన్ కిరీటీ హారీ హిరణ్మయవపుర్ధృతశఙ్ఖచక్రః ॥ ౧౫౫॥

సశఙ్ఖచక్రం రవిమణ్డలే స్థితం కుశేశయాక్రాన్తమనన్తమచ్యుతమ్ ।
భజామి బుద్ధయా తపనీయమూర్తిం సురోత్తమం చిత్రవిభూషణోజ్జ్వలమ్ ॥ ౧౫౬॥

ఏవం బ్రహ్మాదయో దేవా ఋషయశ్చ తపోధనాః ।
కీర్తయన్తి సురశ్రేష్ఠం దేవం నారాయణం బిభువ ॥ ౧౫౭॥

వేదవేదాఙ్గశరీరం దివ్యదీప్తికరం పరమ్ ।
రక్షోశ్నం రక్తవర్ణం చ సృష్టిసంహారకారకమ్ ॥ ౧౫౮॥

ఏకచక్రో రథో యస్య దివ్యః కనకభూషితః ।
స మే భవతు సుప్రీతః పద్మహస్తో దివాకరః ॥ ౧౫౯॥

ఆదిత్యః ప్రథమం నామ ద్వితీయం తు దివాకరః ।
తృతీయం భాస్కరః ప్రోక్తం చతుర్థం తు ప్రభాకరః ॥ ౧౬౦॥

పఞ్చమం తు సహస్రాంశుః షష్ఠం చైవ త్రిలోచనః ।
సప్తమం హరిదశ్వశ్చ అష్టమం తు విభావసుః ॥ ౧౬౧॥

నవమం దినకృత్ప్రోక్తం దశమం ద్వాదశాత్మకమ్ ।
ఏకాదశం త్రయీముర్తిర్ద్వాదశం సూర్య ఏవ చ ॥ ౧౬౨॥

ద్వాదశాదిత్యనామాని ప్రాతఃకాలే పఠేన్నరః ।
దుఃస్వప్ననాశనం చైవ సర్వదుఃఖం చ నశ్యతి ॥ ౧౬౩॥

దద్రుకుష్ఠహరం చైవ దారిద్ర్యం హరతే ధ్రువమ్ ।
సర్వతీర్థప్రదం చైవ సర్వకామప్రవర్ధనమ్ ॥ ౧౬౪॥

యః పఠేత్మాతరుత్థాయ భక్త్యా నిత్యమిదం నరః ।
సౌఖ్యమాయుస్తథాఽఽరోగ్యం లభతే మోక్షమేవ చ ॥ ౧౫॥

అగ్నిమీడే నమస్తుభ్యమిషేత్వోర్జేస్వరూపిణే ।
అగ్ర ఆయాహి పీతస్త్వం నమస్తే జ్యోతిషాం పతే ॥ ౧౬౬॥

శన్నో దేవి నమస్తుభ్యం జగచ్చక్షుర్నమోఽస్తు తే ।
పఞ్చమాయోపవేదాయ నమస్తుభ్యం నమోనమః ॥ ౧౬౭॥

పద్మాసనః పద్మకరః పద్మగర్భసమద్యుతిః ।
సప్తాశ్వరథసంయుక్తో ద్విభుజః స్యాత్సదా రవిః ॥ ౧౬౮॥

ఆదిత్యస్య నమస్కారం యే కుర్వన్తి దినేదినే ।
జన్మాన్తరసహస్రేషు దారిద్ర్యం నోపజాయతే ॥ ౧౬౯॥

(నమో ధర్మనిధానాయ నమః సుకృతసాక్షిణే ।
నమః ప్రత్యక్షదేవాయ భాస్కరాయ నమోనమః ॥

అపరః శరణం నాస్తి త్వమేవ శరణం మమ ।
తస్మాత్కారుణ్యభావేన రక్ష రక్ష దివాకర ॥

పౌరోహిత్యం రజనిచరణం గ్రామణీత్వం నిః యోగో
     మాఠాపత్యం వితథవచనం సాక్షివాదః పరాన్నమ్ ।
బ్రహ్మద్వేష ఖలజనరతిః ప్రాణిషు నిర్దయత్వం
     మాభూదేతన్మమ దినపతే జన్మజన్మాన్తరేఽపి ॥

ఉదయంస్తు మహాభానుస్తేజసా చాభయఙ్కరః ।
సహస్రరశ్మిదీప్తశ్చత్వాదిత్యః ప్రీయతాం మమ ॥)
ఉదయగిరిముపేతం భాస్కరం పద్మహస్తం
    నిఖిలభువననేత్రం రత్నంరత్నోపమేయమ్ ।
తిమిరకరిమృగేన్ద్రం బోధకం పద్మినీనాం
    సురవరమభివన్దే సున్దరం విశ్వవన్ద్యమ్ ॥ ౧౭౦॥

ఇతి శ్రీభవిష్యోత్తరపురాణే శ్రీకృష్ణార్జునసంవాదే
ఆదిత్యహృదయస్తోత్రం సమ్పూర్ణమ్ ॥