ఛిన్నమస్తా స్తోత్రం అథవా ప్రచండ చండికా స్తోత్రం (శంకరాచార్య విరచిత) prachanda chandika stotram telugu

ఛిన్నమస్తా స్తోత్రం అథవా  ప్రచండ చండికా స్తోత్రం (శంకరాచార్య విరచిత)

శ్రీగణేశాయ నమః ।

ఆనన్దయిత్రి పరమేశ్వరి వేదగర్భే

మాతః పురన్దరపురాన్తరలబ్ధనేత్రే ।

లక్ష్మీమశేషజగతాం పరిభావయన్తః

సన్తో భజన్తి భవతీం ధనదేశలబ్ధ్యై ॥ ౧॥

లజ్జానుగాం విమలవిద్రుమకాన్తికాన్తాం

కాన్తానురాగరసికాః పరమేశ్వరి త్వామ్ ।

యే భావయన్తి మనసా మనుజాస్త ఏతే

సీమన్తినీభిరనిశం పరిభావ్యమానాః ॥ ౨॥

మాయామయీం నిఖిలపాతకకోటికూటవిద్రావిణీం

భృశమసంశయినో భజన్తి ।

త్వాం పద్మసున్దరతనుం తరుణారుణాస్యాం

పాశాఙ్కుశాభయవరాద్యకరాం వరాస్త్రైః ॥ ౩॥

తే తర్కకర్కశధియః శ్రుతిశాస్త్రశిల్పైశ్ఛన్దోఽ-

భిశోభితముఖాః సకలాగమజ్ఞాః ।

సర్వజ్ఞలబ్ధవిభవాః కుముదేన్దువర్ణాం

యే వాగ్భవే చ భవతీం పరిభావయన్తి ॥ ౪॥

వజ్రపణున్నహృదయా సమయద్రుహస్తే

వైరోచనే మదనమన్దిరగాస్యమాతః ।

మాయాద్వయానుగతవిగ్రహభూషితాఽసి

దివ్యాస్త్రవహ్నివనితానుగతాఽసి ధన్యే ॥ ౫॥

వృత్తత్రయాష్టదలవహ్నిపురఃసరస్య

మార్తణ్డమణ్డలగతాం పరిభావయన్తి ।

యే వహ్నికూటసదృశీం మణిపూరకాన్తస్తే

కాలకణ్టకవిడమ్బనచఞ్చవః స్యుః ॥ ౬॥

కాలాగరుభ్రమరచన్దనకుణ్డగోల-

ఖణ్డైరనఙ్గమదనోద్భవమాదనీభిః ।

సిన్దూరకుఙ్కుమపటీరహిమైర్విధాయ

సన్మణ్డలం తదుపరీహ యజేన్మృడానీమ్ ॥ ౭॥

చఞ్చత్తడిన్మిహిరకోటికరాం విచేలా-

ముద్యత్కబన్ధరుధిరాం ద్విభుజాం త్రినేత్రామ్ ।

వామే వికీర్ణకచశీర్షకరే పరే తామీడే

పరం పరమకర్త్రికయా సమేతామ్ ॥ ౮॥

కామేశ్వరాఙ్గనిలయాం కలయా

సుధాంశోర్విభ్రాజమానహృదయామపరే స్మరన్తి ।

సుప్తాహిరాజసదృశీం పరమేశ్వరస్థాం

త్వామాద్రిరాజతనయే చ సమానమానాః ॥ ౯॥

లిఙ్గత్రయోపరిగతామపి వహ్నిచక్ర-

పీఠానుగాం సరసిజాసనసన్నివిష్టామ్ ।

సుప్తాం ప్రబోధ్య భవతీం మనుజా

గురూక్తహూఁకారవాయువశిభిర్మనసా భజన్తి ॥ ౧౦॥।

శుభ్రాసి శాన్తికకథాసు తథైవ పీతా

స్తమ్భే రిపోరథ చ శుభ్రతరాసి మాతః ।

ఉచ్చాటనేఽప్యసితకర్మసుకర్మణి త్వం

సంసేవ్యసే స్ఫటికకాన్తిరనన్తచారే ॥ ౧౧॥

త్వాముత్పలైర్మధుయుతైర్మధునోపనీతైర్గవ్యైః

పయోవిలులితైః శతమేవ కుణ్డే ।

సాజ్యైశ్చ తోషయతి యః పురుషస్త్రిసన్ధ్యం

షణ్మాసతో భవతి శక్రసమో హి భూమౌ ॥ ౧౨॥

జాగ్రత్స్వపన్నపి శివే తవ మన్త్రరాజమేవం

విచిన్తయతి యో మనసా విధిజ్ఞః ।

సంసారసాగరసమృద్ధరణే వహిత్రం చిత్రం

న భూతజననేఽపి జగత్సు పుంసః ॥ ౧౩॥

ఇయం విద్యా వన్ద్యా హరిహరవిరిఞ్చిప్రభృతిభిః

పురారాతేరన్తః పురమిదమగమ్యం పశుజనైః ।

సుధామన్దానన్దైః పశుపతిసమానవ్యసనిభిః

సుధాసేవ్యైః సద్భిర్గురుచరణసంసారచతురైః ॥ ౧౪॥

కుణ్డే వా మణ్డలే వా శుచిరథ మనునా భావయత్యేవ మన్త్రీ

సంస్థాప్యోచ్చైర్జుహోతి ప్రసవసుఫలదైః పద్మపాలాశకానామ్ ।

హైమం క్షీరైస్తిలైర్వాం సమధుకకుసుమైర్మాలతీబన్ధుజాతీశ్వేతైరబ్ధం

సకానామపి వరసమిధా సమ్పదే సర్వసిద్ధ్యై ॥ ౧౫॥

అన్ధః సాజ్యం సమాంసం దధియుతమథవా యోఽన్వహం యామినీనాం

మధ్యే దేవ్యై దదాతి ప్రభవతి గృహగా శ్రీరముష్యావఖణ్డా ।

ఆజ్యం మాంసం సరక్తం తిలయుతమథవా తణ్డులం పాయసం వా హుత్వా

మాంసం త్రిసన్ధ్యం స భవతి మనుజో భూతిభిర్భూతనాథః ॥ ౧౬॥

ఇదం దేవ్యాః స్తోత్రం పఠతి మనుజో యస్త్రిసమయం

శుచిర్భూత్వా విశ్వే భవతి ధనదో వాసవసమః ।

వశా భూపాః కాన్తా నిఖిలరిపుహన్తుః సురగణా

భవన్త్యుచ్చైర్వాచో యదిహ నను మాసైస్త్రిభిరపి ॥ ౧౭॥

ఇతి శ్రీశంకరాచార్యవిరచితః ప్రచణ్డచణ్డికాస్తవరాజః సమాప్తః