శ్రీఛిన్నమస్తా హృదయం Sri chinnamastha hridayam telugu

శ్రీఛిన్నమస్తా హృదయం

 శ్రీగణేశాయ నమః ।

శ్రీపార్వత్యువాచ ।

శ్రుతం పూజాదికం సమ్యగ్భవద్వక్త్రాబ్జనిఃసృతమ్ ।

హృదయం ఛిన్నమస్తాయాః శ్రోతుమిచ్ఛామి సామ్ప్రతమ్ ॥ ౧॥

ఓం మహాదేవ ఉవాచ ।

నాద్యావధి మయా ప్రోక్తం కస్యాపి ప్రాణవల్లభే ।

యత్వయా పరిపృష్టోఽహం వక్ష్యే ప్రీత్యై తవ ప్రియే ॥ ౨॥

ఓం అస్య శ్రీఛిన్నమస్తాహృదయస్తోత్రమన్త్రస్య భైరవ ఋషిః ,

సమ్రాట్ ఛన్దః , ఛిన్నమస్తా దేవతా , హూం బీజమ్ ,

ఓం శక్తిః , హ్రీం కీలకం , శత్రుక్షయకరణార్థే పాఠే వినియోగః ॥

ఓం భైరవఋషయే నమః శిరసి ।

ఓం సమ్రాట్ఛన్దసే నమో ముఖే ।

ఓం ఛిన్నమస్తాదేవతాయై నమో హృది ।

ఓం హూం బీజాయ నమో గుహ్యే ।

ఓం ఓం శక్తయే నమః పాదయోః ।

ఓం హ్రీం కీలకాయ నమో నాభౌ ।

ఓం వినియోగాయ నమః సర్వాఙ్గే ।

ఇతి ఋష్యాదిన్యాసః ।

ఓం ఓం అఙ్గుష్ఠాభ్యాం నమః ।

ఓం హూం తర్జనీభ్యాం నమః ।

ఓం హ్రీం మధ్యమాభ్యాం నమః ।

ఓం ఐం అనామికాభ్యాం నమః ।

ఓం క్లీం కనిష్ఠికాభ్యాం నమః ।

ఓం హూం కరతలకరపృష్ఠాభ్యాం నమః ।

ఇతి కరన్యాసః ।

ఓం ఓం హృదయాయ నమః ।

ఓం హూం శిరసే స్వాహా ।

ఓం హ్రీం శిఖాయై వషట్ ।

ఓం ఐం కవచాయ హుమ్ ।

ఓం క్లీం నేత్రత్రయాయ వౌషట్ ।

ఓం హూం అస్త్రాయ ఫట్ ।

ఇతి హృదయాదిషడఙ్గన్యాసః ।

రక్తాభాం రక్తకేశీం కరకమలలసత్కర్త్రికాం కాలకాన్తిం

విచ్ఛిన్నాత్మీయముణ్డాసృగరుణబహులోదగ్రధారాం పిబన్తీమ్ ।

విఘ్నాభ్రౌఘప్రచణ్డశ్వసనసమనిభాం సేవితాం సిద్ధసఙ్ఘైః

పద్మాక్షీం ఛిన్నమస్తాం ఛలకరదితిజచ్ఛేదినీం సంస్మరామి ॥

ఇతి ధ్యానమ్ ।

వన్దేఽహం ఛిన్నమస్తాం తాం ఛిన్నముణ్డధరాం పరామ్ ।

ఛిన్నగ్రీవోచ్ఛటాచ్ఛన్నాం క్షౌమవస్త్రపరిచ్ఛదామ్ ॥ ౨॥

సర్వదా సురసఙ్ఘేన సేవితాఙ్ఘ్రిసరోరుహామ్ ।

సేవే సకలసమ్పత్త్యై ఛిన్నమస్తాం శుభప్రదామ్ ॥ ౩॥

యజ్ఞానాం యోగయజ్ఞాయ యా తు జాతా యుగే యుగే ।

దానవాన్తకరీం దేవీం ఛిన్నమస్తాం భజామి తామ్ ॥ ౪॥

వైరోచనీం వరారోహాం వామదేవవివర్ద్ధితామ్ ।

కోటిసూర్య్యప్రభాం వన్దే విద్యుద్వర్ణాక్షిమణ్డితామ్ ॥ ౫॥

నిజకణ్ఠోచ్ఛలద్రక్తధారయా యా ముహుర్ముహుః ।

యోగినీస్తర్పయన్త్యుగ్రా తస్యాశ్చరణమాశ్రయే ॥ ౬॥

హూమిత్యేకాక్షరం మన్త్రం యదీయం యుక్తమానసః ।

యో జపేత్తస్య విద్వేషీ భస్మతాం యాతి తాం భజే ॥ ౭॥

హూం స్వాహేతి మనుం సమ్యగ్యః స్మరత్యర్తిమాన్నరః ।

ఛినత్తి చ్ఛిన్నమస్తాయా తస్య బాధాం నమామి తామ్ ॥ ౮॥

యస్యాః కటాక్షమాత్రేణ క్రూరభూతాదయో ద్రుతమ్ ।

దూరతః సమ్పలాయన్తే చ్ఛిన్నమస్తాం భజామి తామ్ ॥ ౯॥

క్షితితలపరిరక్షాక్షాన్తరోషా సుదక్షా

ఛలయుతఖలకక్షాచ్ఛేదనే క్షాన్తిలక్ష్యా ।

క్షితిదితిజసుపక్షా క్షోణిపాక్షయ్యశిక్షా

జయతు జయతు చాక్షా చ్ఛిన్నమస్తారిభక్షా ॥ ౧౦॥

కలికలుషకలానాం కర్త్తనే కర్త్రిహస్తా

సురకువలయకాశా మన్దభానుప్రకాశా ।

అసురకులకలాపత్రాసికాఽమ్లానమూర్తి

జయతు జయతు కాలీ చ్ఛిన్నమస్తా కరాలీ ॥ ౧౧॥

భువనభరణభూరిభ్రాజమానానుభావా

భవభవవిభవానాం భారణోద్భాతభూతిః ।

ద్విజకులకమలానాం భాసినీ భానుమూర్తి

భవతు భవతు వాణీ చ్ఛిన్నమస్తా భవానీ ॥ ౧౨॥

మమ రిపుగణమాశు చ్ఛేత్తుముగ్రం కృపాణం

సపది జనని తీక్ష్ణం ఛిన్నముణ్డం గృహాణ ।

భవతు తవ యశోఽలం ఛిన్ధి శత్రూన్ఖలాన్మే

మమ చ పరిదిశేష్టం ఛిన్నమస్తే క్షమస్వ ॥ ౧౩॥

ఛిన్నగ్రీవా ఛిన్నమస్తా ఛిన్నముణ్డధరాఽక్షతా ।

క్షోదక్షేమకరీ స్వక్షా క్షోణీశాచ్ఛాదనక్షమా ॥ ౧౪॥

వైరోచనీ వరారోహా బలిదానప్రహర్షితా ।

బలిపూజితపాదాబ్జా వాసుదేవప్రపూజితా ॥ ౧౫॥

ఇతి ద్వాదశనామాని చ్ఛిన్నమస్తాప్రియాణి యః ।

స్మరేత్ప్రాతః సముత్థాయ తస్య నశ్యన్తి శత్రవః ॥ ౧౬॥

యాం స్మృత్వా సన్తి సద్యః సకలసురగణాః సర్వదా సమ్పదాఢ్యాః

శత్రూణాం సఙ్ఘమాహత్య విశదవదనాః స్వస్థచిత్తాః శ్రయన్తి ।

తస్యాః సఙ్కల్పవన్తః సరసిజచరణాం సతతం సంశ్రయన్తి సాఽఽద్యా

శ్రీశాదిసేవ్యా సుఫలతు సుతరం ఛిన్నమస్తా ప్రశస్తా ॥ ౧౭॥

ఇదం హృదయమజ్ఞాత్వా హన్తుమిచ్ఛతి యో ద్విషమ్ ।

కథం తస్యాచిరం శత్రుర్నాశమేష్యతి పార్వతి ॥ ౧౮॥

యదీచ్ఛేన్నాశనం శత్రోః శీఘ్రమేతత్పఠేన్నరః ।

ఛిన్నమస్తా ప్రసన్నా హి దదాతి ఫలమీప్సితమ్ ॥ ౧౯॥

శత్రుప్రశమనం పుణ్యం సమీప్సితఫలప్రదమ్ ।

ఆయురారోగ్యదం చైవ పఠతాం పుణ్యసాధనమ్ ॥ ౨౦॥

॥ ఇతి శ్రీనన్ద్యావర్తే మహాదేవపార్వతీసంవాదే

శ్రీఛిన్నమస్తాహృదయస్తోత్రం సమ్పూర్ణమ్ ॥