శ్రీ హనుమాన్ స్తవ రాజః (హనుమాన్ కల్పః) sri hanuman stava rajaha telugu

శ్రీ హనుమాన్ స్తవ రాజః (హనుమాన్ కల్పః)

శ్రీగణేశాయ నమః ।

హనుమానువాచ ।

తిరశ్చామపి యో రాజా సమవాయం సమీయుషామ్ ।
తథా సుగ్రీవముఖ్యానాం యస్తం వన్ద్యం నమామ్యహమ్ ॥ ౧॥

సకృదేవ ప్రసన్నాయ విశిష్టాయైవ రాజ్యదః ।
విభీషణాయ యో దేవస్తం వీరం ప్రణమామ్యహమ్ ॥ ౨॥

యో మహాపురుషో వ్యాపీ మహాబ్ధౌ కృతసేతుకః ।
స్తుతో యేన జటాయుశ్చ మహావిష్ణుం నమామ్యహమ్ ॥ ౩॥

తేజసాప్యాయితా యస్య జ్వలన్తి జ్వలనాదయః ।
ప్రకాశతే స్వతన్త్రో యస్తం జ్వలన్తం నమామ్యహమ్ ॥ ౪॥

సర్వతోముఖతా యేన లీలయా దర్శితా రణే ।
రాక్షసేశ్వరయోధానాం తం వన్దే సర్వతోముఖమ్ ॥ ౫॥

నృభావం తు ప్రపన్నానాం హినస్తి చ సదా రుజమ్ ।
నృసింహతనుమప్రాప్తో యస్తం నృసింహం నమామ్యహమ్ ॥ ౬॥

యస్మాద్విభ్యతి వాతార్కజ్వలనేన్ద్రాః సమృత్యవః ।
భయం తనోతి పాపానాం భీషణం తం నమామ్యహమ్ ॥ ౭॥

పరస్య యోగ్యతాం వీక్ష్య హరతే పాపసన్తతిమ్ ।
పురస్య యోగ్యతాం వీక్ష్య తం భద్రం ప్రణమామ్యహమ్ ॥ ౮॥

యో మృత్యుం నిజదాసానాం మారయత్యతిచేష్టదః ।
తత్రాపి నిజదాసార్థం మృత్యుమృత్యుం నమామ్యహమ్ ॥ ౯॥

యత్పాదపద్మప్రణతో భవత్యుత్తమపురుషః ।
తమీశం సర్వదేవానాం నమనీయం నమామ్యహమ్ ॥ ౧౦॥

ఆత్మభావం సముత్క్షిప్య దాస్యం చైవ రఘుత్తమమ్ ।
భజేఽహం ప్రత్యహం రామం ససీతం సహలక్ష్మణమ్ ॥ ౧౧॥

నిత్యం శ్రీరామభక్తస్య కిఙ్కరా యమకిఙ్కరాః ।
శివవత్యో దిశస్తస్య సిద్ధయస్తస్య దాసికాః ॥ ౧౨॥

ఇదం హనుమతా ప్రోక్తం మన్త్రరాజాత్మకం స్తవమ్ ।
పఠేదనుదినం యస్తు స రామే భక్తిమాన్భవేత్ ॥ ౧౩॥

॥ ఇతి హనుమత్కల్పే శ్రీహనుమన్మన్త్రరాజాత్మకస్తవరాజః సమ్పూర్ణమ్ ॥